स्याङ्जामा पहिरोमा पुरिएर पूर्वगाविस अध्यक्षको मृत्यु, वडासदस्य घाइते !

स्याङजा । स्याङ्जामा पहिरोमा पुरिएर पूर्व गाविस अध्यक्षको मृत्यु भएको छ । कालीगण्डकी गाउँपालिका–४ बिर्घास्थित खहरेमा पहिरो जाँदा ७० वर्षीय इमानसिंह रानाको मृत्यु भएको हो । उनी साविकको विर्घा गाविसका पूर्वअध्यक्ष हुन ।

पहिरोमा परी तीन जना बेपत्ता छन भने दुई जना घाइते भएका छन । बिर्घाकै हुमाकन्त पाण्डे र बुद्ध रानालाई घाइते अवस्थामा उद्धार गरिएको छ । स्थानीय प्रेमचन्द्र पाण्डे, गिमानसिंह राना र टीका थापा भने बेपत्ता छन् ।

बेपत्ताको खोजी भइरहेको र घाइतेको स्थानीय बिर्घा स्वास्थ्य चौकीमा उपचार भइरहेको छ । घाइते हुमकान्त वडा नम्बर ४ का वडा सदस्य हुन् । गाउँमा खानेपानीको धारा नआएपछि मुलमा पुगेका उनीहरूलाई माथिबाट खसेको पहिरोले पुरेको हो। उद्धार कार्य अहिले पनि जारी छ ।