उद्योग वाणिज्य महासंघको वरिष्ठ उपाध्यक्षका लागि ढकाल र प्रधानको लडाई !

काठमाडौं । नेपाल उद्योग वाणिज्य महासंघको चुनाव आउन अझै एक महिना बाँकी छ । तर चुनावको माहोल भने निकै तातेको छ । आउँदो कार्यकालका लागि अध्यक्ष बन्न चुनावी प्यानल घोषणा हुने क्रम शुरू भएकाे छ ।

उद्योग वाणिज्य संघको विधानमा वरिष्ठ उपाध्यक्ष स्वतः अध्यक्ष हुने नयाँ व्यवस्था छ । यो व्यवस्थाअनुसार अहिलेका वरिष्ठ उपाध्यक्ष शेखर गोल्छा अध्यक्ष स्वतः बन्दैछन् । वरिष्ठ उपाध्यक्षका लागि व्यवसायीद्धय चन्द्र ढकाल र किशोर प्रधान  चुनावी मैदानमा लड्दैछन ।

दुबै जना वर्तमान उपाध्यक्ष हुन । वरिष्ठ उपाध्यक्षका लागि प्रधान र ढकालको लडाई शुरु भएको छ । अहिलेदेखि नै चुनावका लागि अनाैपिचारिक प्यानल घोषणा गरिसकेका दुवै जनाले प्रचार पनि तीव्र रुपमा गरिरहेका छन् ।

ढकाल समूहले मंगलबार चुनावी प्यानल घोषणा गर्दैछ । पत्रकार सम्मेलन गरेर प्यानल घोषणा गरेपछि चुनावको माहोल थप तातिनेछ । उनको समूहबाट जिल्ला–नगरउपाध्यक्षमा गुणनिधि तिवारी, वस्तुगत उपाध्यक्षमा उमेशलाल श्रेष्ठ दोहोरिदै छन । एशोसिएट उपाध्यक्षमा रामचन्द्र संघाईलाई उम्मेदवार बनाउने तयारी छ ।

वरिष्ठ उपाध्यक्षका अर्का दाबेदार किशोर प्रधानले जिल्ला–नगर उपाध्यक्षमा दिनेश श्रेष्ठलाई उठाउने तयारी गरेका छन । उनी महासंघको प्रदेश ३ कमिटीका अध्यक्ष हुन् । प्रधान समूहबाट वस्तुगत उपाध्यक्षमा अञ्जन श्रेष्ठ र एशोसिएट उपाध्यक्षमा शौरभ ज्योति उठ्दै छन ।