पहिरोको उच्च जोखिममा रहेको बस्तीलाई सुरक्षित स्थानमा सारियाे

प्रकाश डोटेल

स्याङ्जा । स्याङ्जाको वालिङ नगरपालिकाले पहिरोको उच्च जोखिममा रहेको बस्तीलाई सुरक्षित स्थानमा सारिएकाे छ । नगरपालिकाको विपद् ब्यवस्थापन समितिले बाढी पहिरोको उच्च जोखिममा रहेका वालिङ नगरपालिका वडा नं. ८ को दमाईडाँडाका ७ घरपरिवारलाई सुरक्षित स्थानमा स्थानान्तरण गरेको नगर प्रमुख दिलीपप्रताप खाँणले बताए ।

दलित समुदायको बस्ती रहेको उक्त गाउँका ७ घरपरिवारलाई नजिकैको अमिलाथुम आधारभूत विद्यालयको भवनमा सारिएको हाे । तत्काल मानवीय क्षति नहोस् भन्नका लागि नजिकैको विद्यालयमा सारेका हौं यो दीर्घकालीन नभई अस्थायी भएको नगर प्रमुख खाँणले जानकारी दिए ।

वर्षायाममा बाढी पहिरोको उच्च जोखिम हुन सक्ने संभावित गाउँलाई पूर्व सावधानीस्वरुप विद्यालयमा स्थानान्तरण गरिएको र वर्षायाम हटेसँगै उनीहरुलाई दीर्घकालीन रुपमा बसोबासको ब्यवस्थापन मिलाउनका लागि जग्गाको खोजी कार्य भईरहेको नगर प्रमुख खाँणले बताए ।

त्यस्तै वालिङ नगरपालिकाको वडा नं. १३ को कुसुण्डेमा पनि ३२ घरधुरी पहिरोको उच्च जोखिममा रहेकाले उनीहरुलाई पनि सुरक्षित स्थानमा सार्ने तयारी भईरहेको नगर उपप्रमुख कल्पना तिवारीले बताईन् ।