झण्डै एक हप्तापछि ओली–प्रचण्डबीचको वार्ता पनि निष्कर्षविहिन

काठमाडौं । प्रधानमन्त्री तथा नेकपाका अध्यक्ष केपी शर्मा ओली र अर्का अध्यक्ष प्रचण्डबीचको एक घण्टा वार्ता निष्कर्षविहिन भएको छ । झण्डै एक हप्तापछि मंगलबार बालुवाटारमा बसेको दुई अध्यक्षबीचको वार्ता निष्कर्षविहिन भएको बालुवाटारमा रहेका नेकपाका नेताहरुले बताएका छन ।

मंगलबार नेकपाभित्रको किचलो समाधानका लागि प्रचण्ड ११ बजे नै बालुवाटार पुगेका थिए । १२ बजेपछि शुरु भएको वार्ता एक बजेसम्म चलेपनि कुनै निष्कर्ष ननिस्केको नेताहरुले बताएका छन । यसअघि ओलीले प्रधानमन्त्री र अध्यक्ष पद नछाड्ने र बहुमतबाट कारबाही गरे नेकपा फुटाएर नयाँ पार्टी बनाउने चेतावनी दिएका थिए ।

त्यसयता मंगलबार भएको वार्तामा पनि ठोस सहमति हुन नसकेको नेताहरुको भनाईँ छ । यसबीचमा प्रचण्डले चितवन पुगेर नेकपा कुनै हालतमा नफुट्ने र कार्यकर्तामा निराशा नआउने बताएका थिए । प्रचण्डको सार्वजनिक भनाईपछि ओलीलाई बल पुगेको छ ।

अब प्रचण्ड लचिलो भएको बुझेका ओलीले थप सहमति नगर्ने र पूरा पाँच बर्षे प्रधानमन्त्री काल बिताएर आगामी महाधिवेशनबाट नेकपाको अध्यक्ष हुने दाउ हेरिरहेका छन । तर प्रचण्ड र माधव नेपाल भने अहिले नै ओलीले प्रधानमन्त्री वा अध्यक्ष पदमध्ये एक छाड्नपर्ने बताउदै आएका छन ।

यसमा कुरा नमिल्दा दुई अध्यक्षबीचको वार्ता सहमतिमा पुग्न सकेको छैन भने स्थायी कमिटी बैठक साउन २ गतेसम्मका लागि स्थगित छ ।