अयोध्या अभिव्यक्ति फिर्ता लिएर आत्मालोचना गर्न ओलीलाई बामदेवको सुझाव

काठमाडौं । एकपछि अर्को विवादमा तानिएका प्रधानमन्त्री केपी शर्मा ओलीलाई नेकपाकै नेताहरुले साथ दिन छाडेका छन । बेला बेला मनलाग्दी बोल्ने ओलीले पार्टीमा भने ठूलै तरंग पनि ल्याउने गरेको छ । हिजो मात्रै भगवान राम नेपालकै अयोध्यामा जन्मेको बताएका ओली फेरि विवादमा तानिएका छन ।

यसअघि भारतले आफूलाई प्रधानमन्त्री पदबाट हटाउन लागेको भनेपछि विवादमा आएका ओली यसपटक फेरि अयोध्या रामकाण्डमा जोडिएका छन । यस काण्डपछि पनि सत्तारुढ दलका नेताहरुबीच थप असन्तुष्टि फैलिएको छ । नेकपाका उपाध्यक्ष बामदेव गौतमले अयोध्याबारे दिएको अभिव्यक्ति फिर्ता लिन ओलीलाई सुझाव दिएका छन ।

अनाश्वयक रुपमा बोलेको बोलीले नेपाल र भारतमा आक्रोश फैलिएको भन्दै बामदेवले तत्काल अभिव्यक्ति फिर्ता लिएर आत्मालोचना गर्न ओलीलाई सुझाव दिएका हुन । इतिहासविदहरुले बोल्ने कुरा ओलीले बोलेको र यसले सरकार र पार्टीलाई राम्रो नगर्ने गौतमको भनाई छ ।

ओलीको अभिव्यक्तिका बारेमा गौतमले सामाजिक सञ्जाल फेसबुकमा राखेको धारणा : 

नेपालका प्रधानमन्त्री तथा नेकपाका अध्यक्ष क.केपी शर्मा ओलीले हिजो अर्थात असार २९ गते कुनै कार्यक्रममा राम जन्मभूमि नेपालको पर्सा जिल्लामा पर्छ भन्दै दिनुभएको मन्तव्यले नेपाल र भारतमा अत्यन्त तिखो प्रतिक्रिया उत्पन्न गरेको छ । आज भन्दा दुई वर्ष पहिले उहाँलाई भेट्न म बालुवाटार गएका बखत यो बिषय बारे चर्चा गर्नुभएको थियो ।

मैले उहाँलाई यस सम्बन्धमा आफुले अध्ययन गरेका कतिपय सन्दर्भ सामाग्री उल्लेख गर्दै विना अनुसन्धान, विना तथ्य प्रमाण यस्तो विषयलाई तपाईले कहीँ कतै व्यक्त नगर्न भन्दै सल्लाह पनि दिएको थिएँ । मलाई यस विषयमा उहाँले कहीँ न कहीँ सार्वजनिक गरिहाल्नु हुन्छ कि भन्ने शंका पनि लागेको थियो । नभन्दै हिजो तथ्य प्रमाण विना त्यसलाई सार्वजनिक गरेरै छोड्नु भयो ।

क.केपी ओली अहिले मुलुकको प्रधानमन्त्री हुनुहुन्छ र सत्ताधारी पार्टीको अध्यक्ष पनि हुनुुहुन्छ । अहिले उहाँ चाहदा सबै पक्षबाट अनुसन्धान गर्न, तथ्यहरु जुटाउन, आएका अनुमानहरुको तथ्यसंगत विश्लेषण गर्न चाहिने साधनस्रोत जुटाउन सक्ने अवस्थामा हुनुहुन्छ । उहाँले उठाउनु भएको विषय सबै पक्षबाट तथ्य र तर्कसंगत सावित भएको अवस्थामा प्रधानमन्त्रीले हैन इतिहासकारहरुले सार्वजनिक गर्नु पर्दथ्यो ।

भगवान रामको जन्म जहाँ भए पनि यथार्थवादी कम्युनिष्टहरुका निम्ति केही फरक पर्दैन । रामका भक्तहरु नेपाल र भारतमा ठूलो संख्यामा रहेका छन् । यथार्थवादी भएका नाताले इतिहास प्रति हामी कम्युनिष्टहरुले अन्याय गर्न सक्दैनौ । नेपालको इतिहास निर्माणमा योगदान गर्ने महापुरुषहरुको नेपाल रहँदासम्म प्रसंशा गरिरहिने छ । संसारमा धेरै धर्महरु छन्, धेरै धार्मिक सम्प्रदायहरु छन् र तिनका अनुयायीहरु करोडौंको संख्यामा रहेका छन् ।

उनीहरुको धार्मिक आस्थामा चोट पु¥याउने क्रियाकलाप गर्न कसैले हुदैन । त्यसैगरी कुनै पनि धार्मिक संरचनालाई प्रयोग गरेर नत राष्ट्रले न समुदायले न कुनै व्यक्तिले आफ्नो स्वार्थ पुरा गर्ने दुश्कर्म गर्न हुन्न । यस अर्थमा हामी कम्युनिष्टहरु धर्म निरपेक्ष हुन चाहन्छौ ।

राम जन्मभूमिका सम्बन्धमा प्रधानमन्त्रीले दिनुभएको मन्तव्यबाट जुन राष्ट्रिय र अन्तर्राष्ट्रिय विवाद उत्पन्न गरेको छ त्यसको व्यापकतालाई ध्यानमा राख्दै उहाँले आफ्नो मन्तव्य फिर्ता लिदैं जनतासमक्ष आत्मालोचना गर्नु म उपयुक्त ठान्दछु । साथै प्राविधिक तथा इतिहासविद्हरुको टोली बनाई तत्सम्बन्धमा अनुसन्धान र तथ्य संकलनमा लाग्न प्रधानमन्त्री तथा पार्टी अध्यक्ष क.केपी ओलीलाई विनम्र अनुरोध पनि गर्दछु ।