मासिक २५ हजार रुपैयाँ राहतकाे माग गर्दै सैलुन व्यवसायीको प्रदर्शन

काठमाडौं । लकडाउनले गर्दा पसल खोल्न नसकेको भन्दै सैलुन व्यवसायीले काठमाडौंमा विरोध प्रदर्शन गरेका छन् । नेपाल नाई ट्रेड युनियनको आयोजनामा माइतीघरमा भएको प्रदर्शनमा सैलुन व्यवसायीले सैलुन खोल्न पाउनुपर्ने माग गरे ।

उनीहरुले कपाल काट्ने काइँयो, कैची र एप्रोन लगाएर प्रदर्शन गरेका हुन । देशभरिका सबै सैलुन र पार्लर खोल्न, लकडाउन अवधिभर नाई श्रमिक हजामको पसल भाडा र कोठा भाडा पूर्ण रुपमा मिनाहा गर्न, नाई श्रमिकलाई निशुल्क पीपीई सेट वितरण गर्न उनीले माग गरेका छन ।

कपाल काट्ने श्रमिकलाई लकडाउन अवधिभर मासिक २५ हजार दिन, लकडाउन अवधिभरको बैंक ब्याज मिनाहा गर्न र कम्तीमा ५० लाखको जीवन बिमा गर्न पनि उनीहरुको माग छ ।

अहिले लकडाउनका बेला केही सैलुन खुलेका छन । उनीहरुले कपाल काटेबाँपत दोब्बर शुल्क पनि लिने गरेका छन । तर सुरक्षित नभएको भन्दे ग्राहकको संख्या घट्दो छ । उनीहरुले यसैकारण विरोध प्रदर्शन गरेका हुन् ।