क्वारेन्टाईनबाट घर जान खोजेका युवामाथि प्रहरीद्धारा कुटपिट

सुर्खेत । प्रहरीले मरणासन्न हुने गरेर एक युवकलाई कुटपिट गरेका छन । पूर्वी सुर्खेतको सिम्ता गाउँपालिका–६ स्थित बागेश्वरी माविको क्वारेन्टाईनमा राखिएका सोही गाउँपालिका–८ का युवकलाई प्रहरीले कुटपिट गरेको हो।

भारतबाट आएर दुई सातादेखि क्वारेन्टाईनमा रहेका युवक सोमबारसँगै बसेका साथीहरुसँगै घर जान खोज्दा इलाका प्रहरी कार्यालय बादेपिपलका प्रहरी सहायक निरीक्षक विजय पुनले कुटपिट गरेका थिए। पुनको कुटाइबाट युवक गम्भीर घाइते छन्। उनको शरीरभरी निलडाम छ। प्रहरीको कुटाईबाट पीडित युवकले आफ्नो हात भाँचिएको बताएका छन्।

आफन्तले उपचारका लागि अस्पताल लैजना माग गरेपनि स्थानीय तहलेसमेत वेवस्ता गरेर घटनालाई गुपचुप राखेको छ। गाउँपालिका अध्यक्ष कविन्द्रकुमार केसीकै उपस्थितिमा पीडित परिवार र प्रहरीबीच ‘कोरोना सन्चो भएपछि’ उपचार गर्ने सहमति गराइएको छ।

गाउँपालिका अध्यक्ष केसीले दुई सातादेखि क्वारेन्टाईनमा रहेका युवकको सोमबार पोलिमेरीज चेन रियाक्सन पीसीआर परीक्षण गर्दा कोरोना देखिएको बताए। भारतबाट संगै आएका उनका साथीहरुमा कोरोना देखिएन्। उनी साथीहरुसँगै घर जान खोज्दा क्वारेन्टाईन सुरक्षामा अटिएका असई पुनले कुटपिट गरेका थिए।