चर्को आलोचनापछि प्रधानमन्त्री ओलीको अभिव्यक्तिमा परराष्ट्र मन्त्रालयको स्पष्टीकरण

काठमाडौं । नेपाल र भारतमा चर्को विवाद भएपछि प्रधानमन्त्री केपी शर्मा ओलीको अयोध्याबारे परराष्ट्र मन्त्रालयले स्पष्टीकरण दिएको छ । मन्त्रालयले प्रधानमन्त्री ओलीको अभिव्यक्ति राजनीतिक नभई सामाजिक भएको स्पष्टीकरण दिएको छ ।

‘प्रधानमन्त्रीको अभिव्यक्ति राजनीतिक विषयसँग जोडिएको छैन र कसैको भावनामा चोट पुर्‍याउने आशयको पनि होइन’ मन्त्रालयले जारी गरेको विज्ञप्तीमा उल्लेख छ ।

नेपाल र भारतबीचको सम्बन्धमा आँच आउने गरी प्रधानमन्त्रीले अभिव्यक्ति दिएको भन्दै चर्को आलोचना भएपछि परराष्ट्र मन्त्रालय विज्ञप्ती निकाल्न बाध्य भएको हो । विज्ञप्तिमा प्रधानमन्त्री ओलीले धार्मिक र सांस्कृतिक मान्यता खल्बल्याउन नभई सामाजिक स्तरमा टिप्पणी गरेको दाबी गरिएको छ ।

ओलीले अयोध्याको महत्व र यसमा रहेको सांस्कृतिक मूल्यलाई कमजोर पार्न नखोजिएको पनि दाबी गरेको छ । यसअघि प्रधानमन्त्री ओली र भारतीय प्रधानमन्त्री नरेन्द्र मोदीले दुई बर्ष अघि जनकपुरमा रामायण सर्किट र जनकपुर–अयोध्या बस सेवाको संयुक्त रुपमा उद्घाटन गरेको विषयमा विज्ञप्तीमा उल्लेख छ ।