अपाङ्गता र सीमान्तकृत ६७ परिवारलाई राहत वितरण

◊ धीरुभाइ

सप्तरी । भीएसओ नेपालसँगको साझेदारीमा समग्र जनउत्थान केन्द्र लहानले कोरोना भाइरस संक्रमण फैलिन नदिन जारी लकडाउन (बन्दाबन्दी)बाट अतिप्रभावित अपाङ्गता(फरक क्षमता भएका) तथा विपन्न सीमान्तकृत परिवारलाई मंगलबार राहत स्वरुप खाद्यान्न प्रदान गरेको छ ।

सप्तरीको राजविराज नगरपालिका वार्ड नम्बर ६ पुर्नीपोखरी टोल र तिलाठी कोइलाडी गाउँपालिका वार्ड नम्बर ५ बर्साइनका रातो कार्डधारी अपाङ्गता र विपन्न सीमान्तकृत गरी ६७ परिवारलाई खाद्यान्न राहत प्रदान गरेको समग्र उत्थान केन्द्रका रामभरोसी महतोले बताए ।

केन्द्रले राजविराजमा नौ अपाङ्गता र २० विपन्न तथा तिलाठी कोइलाडीमा १८ अपाङ्गता र २० विपन्न परिवारलाई खाद्य सामग्री सहयोग कार्यक्रम अन्तर्गत राहत वितरण गरेको कार्यकारी निर्देशक देवराज पोखरेलले बताए ।

कोभिड–१९ का कारण जारी लकडाउनबाट अतिप्रभावित दैनिक ज्यालादारी गरी खाने ती परिवारलाई जनसमग्र उत्थान केन्द्रले प्रति परिवार ३० किलो चामल, तीन किलो दाल, दुई किलो नून, दुई लिटर खानेतेल, दुई किलो चिनी र चार वटा साबुन प्रदान गरेको संस्थाका जिविकोपार्जन सल्लाहकार रामनाथ साहले बताए ।