आज बिहानैदेखि घाम ! आगामी तीन दिन मौसम सामान्य

काठमाडौं । झण्डै एक हप्ता बर्षापछि आज बिहानै घाम लागेको छ । आगामी तीन दिनसम्मकै मौसम सामान्य रहने जल तथा मौसम विज्ञान विभागले जनाएको छ । केही ठाउँमा भने बर्षा हुनेछ ।

मनसुनी वायु सक्रिय भएकाले केही ठाउँमा भारी बर्षाको सम्भावना रहेपनि सबै ठाउँमा पानी नपर्ने मौसमविद शान्ति कँडेलले जानकारी दिइन् । मनसुनी समय भएकाले बर्षा हुन सक्ने सम्भावना भएपनि हिजो अस्ति जस्तो ठूलो पानी पर्ने सम्भावना भने नरहेको मौसम पूर्वानुमान महाशाखाले जनाएको छ ।

पूर्व र मध्यका केही ठाउँमा बर्षा भइरहेको अर्का मौसमविद गंगा नरगरकोटीले जानकारी दिइन् । दिउँसो भने काठमाडौकै केही ठाउँमा हल्का बर्षाको सम्भावना छ ।

हिजो अस्तिको बर्षाका कारण देशका धेरै ठाउँमा बर्षा हुँदा देशभर ९५ जनाको मृत्यु भएको छ भने ४७ जना बेपत्ता छन । घाइते ८२ जनाको विभिन्न अस्पतालमा उपचार भइरहेको छ ।