ओलीको अभिव्यक्ति अनियन्त्रित र अराजक भएको डा. लोहनीको टिप्पणी

१ साउन, काठमाडौं । राष्ट्रिय प्रजातन्त्र पार्टी (राप्रपा) का अध्यक्ष डा. प्रकाशचन्द्र लोहनीले प्रधानमन्त्री केपी ओलीको अनियन्त्रित र अराजक अभिव्यक्तिले परराष्ट्र नीति धुजा–धुजा पारेर नेपाललाई संकटमा धकेल्ने काम भएको भन्दै चिन्ता व्यक्त गरेका छन् ।

देशका भूभाग जलमग्न भएर बाढी पहिरोले जनधनको क्षति भएको बेला जनताको पिर र पीडाप्रति प्रधानमन्त्री संवेदनशील नहुनु चिन्ताको विषय भएको लोहनीले बताएका हुन् ।

प्रधानमन्त्रीको अराजक र अनियन्त्रित अभिव्यक्तिहरूको मनोविज्ञान के हो ? भन्दै उनले प्रश्न गरेका छन्, ‘वास्तवमा नेपालको परराष्ट सम्बन्धलाई धुजा–धुजा पारेर नेपाललाई संकटमा धकेल्ने काम किन भईरहेछ ?’

अध्यक्ष लोहनीले भने, ‘वास्तवमा आज हाम्रो सीमानामा भारतीयहरूले अन्तर्राष्ट्रिय कानुनको विपरित बनाएको बाँधहरूबाट तराइ, मधेसका थुप्रै जलमग्न गाउँकोको समस्याबारे नेपाल सरकारले बोल्नु पर्ने हो । तर यस्ता जनताको पिर र पीडामा प्रधानमन्त्रीलाई वास्ता छैन । यथार्थमा उहाँको वर्तमान अभिव्यक्ति अनियन्त्रित र अराजक छन् ।’

सामाजिक सञ्जालमा टिप्पणी गर्दै प्रधानमन्त्रीको पछिल्लो अभिव्यक्तिप्रति उनले व्यङग्य गरेका छन् । ‘अब महाभारतको कुरुक्षेत्र पनि नेपालको झापाको तल्लो फाँटमा छ भन्ने तथ्य प्रधानमन्त्रीले घोषणा गर्ने हो की ?’ उनले भने ।

अयोध्या नेपालमै रहेको र राम नेपाली थिए’ भन्ने प्रधानमन्त्रीले दावी गरेपछि सर्वत्र आलोचना भइरहेको छ । पछिल्ला अभिव्यक्तिले देशको राष्ट्रियतामाथि नै प्रश्न उठेको भन्दै लोहनीले अब प्रधानमन्त्री कै पार्टीका नेताहरू र सबै नेपालीले सोच्ने बेला आएको भनेका छन् ।