अब विदेशमा अलपत्र परेकाहरुलाई सरकारले निःशुल्क उद्धार गर्ने

काठमाडौं । सर्वोच्च अदालतको आदेश आएको दुई हप्तापछि सरकारले बल्ल सरकारी कोषबाटै विदेशबाट अलपत्र परकोलाई उद्धार गर्ने भएको छ । अहिलेसम्म उनीहरुकै खर्चमा भइरहेको उद्धार अब सरकारी कोषबाट हुनेछ ।

कोरोनाले देशिक रोजगारीका क्रममा अलपत्र परेका नेपाली नागरिकको उद्धार गरी स्वदेश फिर्ता गर्नेसम्बन्धी निर्देशिका २०७७ मन्त्रिपरिषदबाट पारित भएको छ । अब वैदेशिक रोजगारीमा गई अलपत्र परेका नेपाली सरकारी खर्चमा फर्किन पाउने भएका हुन् ।

कोरोना कहरका कारण अलपत्र नागरिकलाई वैदेशिक रोजगारी प्रवर्द्धन कोषको रकमबाट स्वदेश फिर्ता ल्याउने निर्णय सरकारले गरेको प्रवक्ता डा. युवराज खतिडाले बताए । श्रम स्वीकृति लिई वैदेशिक रोजगारीमा गएर हाल अलपत्र परेका, समस्यामा परेका तथा आफ्नै खर्चमा स्वदेश फर्कन नसक्ने अवस्थाका श्रमिकहरुलाई स्वदेश फर्काउन कोषको रकम प्रयोग गरिनेछ ।

सरकारले विदेशमा अप्ठेरोमा परेर स्वदेश फर्किन चाहने नेपाली नागरिकले आफैंले हवाइजहाजको टिकट खरिद गर्नुपर्ने निर्णय यसअघि गरेको थियो । तर सरकारले शुरुमा सर्वोच्चको आदेशको बेवास्ता गरेको थियो । निकै लामो समयपछि सरकारले राज्य कोषकै लगानीबाट विदेशमा अलपत्र परेकाहरुको उद्धार गर्ने भएपछि परदेशीहरु खुशी भएका छन ।