सिन्धुपाल्चोकका बाढी पहिरो पीडितका घर प्रदेश सरकारले बनाईदिने

२ साउन, हेटौंडा । अविरल बर्षापछि बाढी पहिरोका कारण सिन्धुपाल्चोकमा पूर्णरुपमा क्षति भएका घर बागमती प्रदेश सरकारले बनाई दिने भएको छ । स्थानीय तहले उपलब्ध गराउने जग्गामा प्रदेश सरकारले पीडितहरुका लागि घर निर्माण गरिदिने भएको हो ।

बागमती विपद् व्यवस्थापन निर्देशक समितिको शुक्रबार बसेको बैठकले सिन्धुपाल्चोकका बाढी पहिरो पीडितहरुलाई तत्काल राहत पनि उपलब्ध गराउने र घर पनि निर्माण गरिदिने निर्णय गरेको हो ।

मुख्यमन्त्री डोरमणि पौडेलको अध्यक्षतामा बसेको बैठकले क्षतिको अवस्था हेरी तत्काल स्थानीय तहमार्फत राहत उपलब्ध गराउन निर्णय गरेको हो ।

समितिले बाह्रबिसे नगरपालिकामा ३० लाख, भोटेकोशी गाउँपालिकामा १५ लाख र जुगल गाउँपालिकामा १० लाख रुपैयाँ राहत रकम उपलब्ध गराउने निर्णय भएको मुख्यमन्त्री पौडेलले बताए ।

यसअघि प्रदेश सरकारले मृतकका परिवारलाई राहतस्वरुप एक लाख रुपैयाँ दिने घोषणा गरेको रकम पनि तत्काल उपलब्ध गराइने समितिले जनाएको छ ।