पृथ्वी राजमार्गको पहिरोले काठमाडौं आउने जाने बाटो बन्द !

५ साउन, काठमाडौं । पृथ्वी राजमार्गका विभिन्न ठाउँमा पहिरो जाँदा काठमाडौं आउने बाटो बन्द भएको छ । धादिङ र चितवन जिल्लामा पहिरो जादा पृथ्वी राजमार्ग अवरुद्ध बनेको हो । जसकारण काठमाडौं आउने सबै गाडी बिच बाटोमै राकिएका छन ।

पोखराबाट आउने गाडी चितवनको मुग्लिन र तनहुँको आँबुखैरेनीमा रोकिएका छन । चितवनबाट काठमाडौ आउने गाडी पनि अलपत्र छन । काठमाडौंबाट बाहिरिने गाडी पनि गल्छीसम्म पुगेर रोकिएका छन् । गल्छीको महेशखोलामा ठूलो पहिरो खसेको छ । मुग्लिन नारायणगढ सडकको चार किलोमा ठूलो पहाड नै खसेको छ । पृथ्वी राजमार्गमा चितवन जिल्लामा दर्जन भन्दा बढी पहिरो खसेको छ ।

फिस्लिङ बजार वरपर ५र६ वटा र मौवाखोला वरपर पनि ४ र ५ ठाउँमा पहिरो खसेको छ । सोमबार साँझसम्म पनि निरन्तर वर्षा भइरहेको र पहिरो खसिरहेकाले राजमार्गमा खसेको पहिरो पन्छाउन सकिएको छैन । पहिरो नरोकिदा गाडी चल्न सकेका छैनन् । बर्षा रोकिएपनि विभिन्न ठाउँमा पहिरो जाने क्रम रोकिएको छैन ।

यस्तै बाढीले धादिङको मोवाखोलामा पुल नै भत्काएको छ । काठमाडौं आउँदा चितवनबाट धादिङ प्रवेश गर्ने मोवाखोलाको धादिङतर्फको खण्डमा खोलाले पुल बगाएको हो । धादिङको जोगिमारामा खसेको पहिरोले ३ वटा गाडी बगाएको छ ।