सरकारले मजदुरको बीमा गरिदिने, व्यवसायीले गाडी चलाउने

५ साउन, काठमाडौं । सरकारले मजदुरको कोरोना बीमा गरिदिने भएपछि यातायात व्यवसायी गाडी चलाउन तयार भएका छन । यसअघि यातायात व्यवसायी कोरोनाको जोखिम कायमै रहेको भन्दै गाडी चलाउन तयार भएका थिएनन् ।

यातायात व्यवस्था विभागमा सोमबार नेपाल यातायात व्यवसायी राष्ट्रिय महासंघ र ट्रेड युनियनहरूबीच भएको छलफलमा मजदुरको कोरोना बीमा गरिदिने सर्तमा अबदेखि सबै गाडी चलाउने सहमति भएको हो ।

सबै मजदुरको कोरोना बीमा अब सरकारले गर्नेछ भने मजदुरको मृत्यु भएमा सरकारले क्षतिपूर्ति पनि दिनेछ । यद्यपी सुरक्षाका लागि यातायात व्यवसायीले मजदुरलाई मास्क, पीपीई, ग्लोब्स, स्यानिटाइजर दिनेछन ।

यसअघि नै सरकारले सार्वजनिक गाडी चलाउने दिने निर्णय गरेको थियो । तर यातायात व्यावसायीले जोखिम भन्दै गाडी चलाउन आनाकानी गरेका थिए । केही गाडी चलेपनि सडकमा सबै गाडी भने नचल्दा यात्रुले केही सास्ती झेलिरहेका छन ।