काठको गोलिया लोड गरेकाे ट्रयाक्टरसहित २ पक्राउ

 साउन, मोरङ । कटहरी गाउँपालिका-४ राम चोकबाट अवैध काठको गोलिया लोड गरी विराटनगरतर्फ लैजाँदै गरेको को।२ त ३२४८ नम्बरको ट्रयाक्टरसहित २ जनालाई आइतबार राति प्रहरीले पक्राउ गरेको छ ।

पक्राउ पर्नेहरुमा ट्रयाक्टर चालक रंगेली नगरपालिका-३ बस्ने २७ वर्षीय चालक मेघनाथ मण्ड र सहचालक विराटनगर महानगरपालिका-६ रामपुर बस्ने २० वर्षीय ओम प्रकाश कुमार यादव रहेका छन् ।

अवैध काठको गोलिया चोरी गरी उक्त ट्रयाक्टरमा विराटनगरतर्फ लैजाँदै गरेको अवस्थामा जिल्ला प्रहरी कार्यालय मोरङबाट खटिएको प्रहरीले उनीहरुलाई पक्राउ गरेको हो ।

उनीहरुलाई आवश्यक कारवाहीको लागि काठसहित डिभिजन वन कार्यालय मोरङमा बुझाउने पहल भइरहेको जिल्ला प्रहरी कार्यालय मोरङले जनाएको छ ।