अन्तर्राष्ट्रिय हवाई उडान पनि खोल्ने मन्त्रिपरिषद बैठकको निर्णय

५ साउन, काठमाडौं । सरकारले भदौदेखि अन्तर्राष्ट्रिय उडान पनि खोल्ने निर्णय गरेको छ । सोमबार बसेको मन्त्रिपरिषद बैठकले भदौ १ गतेदेखि अन्तर्राष्ट्रिय उडान पनि खोल्ने निर्णय गरेको हो ।

यसअघि आन्तरिक उडान मात्रै खोल्ने भनिएपनि निश्चित मापदण्ड राखेर अन्तराष्ट्रिय उडान पनि खोल्ने निर्णय भएको संस्कृति, पर्यटन तथा नागरिक उड्ययनमन्त्री योगेश भट्टराईले बताए ।

‘अब कोरोनाको जोखिमलाई भन्दा आवश्यकतालाई हेरेर कदम चाल्नुपर्ने अवस्था आएको छ’ मन्त्री भट्टराईले बालुवाटारमा केही पत्रकारहरुसित भने, ‘सुरक्षा जोखिमलाई ध्यान दिएर नागरिकको आवश्यकतालाई सम्बोधन गर्न अन्तर्राष्ट्रिय उडान पनि खोल्ने मन्त्रिपरिषद बैठकले निर्णय गरेको छ ।’

बाह्य तथा आन्तरिक उडान सुचारु गर्नका लागि कार्यविधि बनाउने जिम्मेवारी मन्त्रिपरिषद बैठकले मन्त्री भट्टराईलाई दिएको छ । भदौमा आन्तरिक र बाह्य दुवै उडान खोल्न सक्ने गरी प्रोटोकल बनाइने पनि उनले बताए । अन्तर्राष्ट्रिय उडान खुलेपछि अहिले ठप्प बनेको पर्यटन व्यवसायले पनि फेरि गति लिने मन्त्री भट्टराईको विश्वास छ ।