पहिरोमा परी आज मात्रै ९ जनाको मृत्यु, २ जना घाइते !

६ साउन, काठमाडौं । देशका विभिन्न ठाउँमा गएको पहिरोमा परी मंगलबार मात्रै ९ जनाको मृत्यु भएको छ । काठमडौं, धादिङ, नवलपरासी, दार्चुला लगायतका ठाउँमा गएको पहिरोमा परी आज मात्रै ९ जनाको मृत्यु भएको र दुई जना घाइते भएको प्रहरीले जनाएको छ ।

काठमाण्डौको टोखा नगरपालिका १ पासिडाँडामा मंगलबार दिउँसो ढिस्कोमा पुरिएर राजकुमार रानामगरका ३ वर्षीय जुम्ल्याहा छोरा छोरी सचिन रानामगर र सन्ध्या रानामगरको मृत्यु भएको छ ।

उनीहरु ढिस्कोमा पुरिएको खबर पाएपछि महानगरीय प्रहरी प्रभाग टोखाबाट खटिएको प्रहरीले स्थानीयको सहयोगमा दुवैको शव फेला पारेको हो । यस्तै धादिङ, त्रिपुरा सुन्दरी गाउँपालिका ६ गोलाङपारी वनमा मंगलबार बिहान आएको पहिरोमा परी एकै परीवारका तीन जनाको मृत्यु भएको छ ।

मृत्यु हुनेमा सोही ठाउँका २५ वर्षीय मिलन खाँण, २२ वर्षीया श्रीमती सम्झना खाँण र ३ वर्षीया छोरी अन्जिता खाँण रहेका छन । पहिरोले घर बगाउँदा उनीहरू बेपत्ता भएको भन्ने खबर प्राप्त हुनासाथ जिल्ला प्रहरी कार्यालय र ईलाका प्रहरी कार्यालय सल्यानटारबाट खटिएको प्रहरीले स्थानीयको सहयोगमा तीनै जनाको शव फेला पारेको हो ।

यस्तै नवलपरासी वर्दघाट सुस्ता पूर्व बुलिङटार गाउँपालिका २ टाँडीमा मंगलबार बिहान आएको पहिरोमा परी सोही स्थानका ६१ वर्षीय शेर बहादुर नेपाली र उनकी श्रीमती ५७ वर्षीया खिलमाया नेपालीको मृत्यु भएको छ । घटनापछि प्रहरी चौकी बुलिङबाट खटिएको प्रहरीले स्थानीयको सहयोगमा खोजी गर्ने क्रममा उनीहरूको शव फेला पारेको हो ।

यस्तै दार्चुला, मालिकार्जुन गाउँपालिका ८ औडाखान बस्ने ३५ वर्षीया लक्ष्मी ढोलीको घरमा सोमबार दिउँसो आएको पहिरोमा परि उनका भाईहरू २४ वर्षीय अर्जुन परियार र मिलन परियारको मृत्यु भएको छ ।

सोही ठाउँमा पहिरो आएको भन्ने खबर प्राप्त हुनासाथ प्रहरी चौकी शंकरपुरबाट खटिएको प्रहरीले लक्ष्मी परियार, उनको ९ वर्षीय छोरा सुभम परियार र छोरी सोनिया परियारलाई सकुशल उद्धार गरेको थियो भने २ जना भाईको शव फेला पारेको थियो ।

घाइतेहरूको स्वास्थ्य चौकी पस्तीमा उपचार भइरहेको छ । पहिरो गएका ठाउँहरुमा तत्काल खटिएको स्थानीय प्रहरीले आवश्यक उद्दार कार्य गरिरहेको छ ।