प्राकृतिक विपदमा परी ज्यान गुमाएका परिवारलाई सरकारले २ लाख दिने !

७ साउन, काठमाडौं । प्राकृतिक विपदमा परेर ज्यान गुमाएकाका परिवारलाई सरकारले २ लाख रुपैयाँ दिने भएको छ । बुधबार गृह मन्त्रालयले प्रेस विज्ञप्ति जारी गर्दै विपद्का घटनामा परिवारका एक सदस्यको मृत्यु भएमा राहतस्वरुप दुई लाख रुपैयाँ दिने निर्णय गरेको हो ।

सोमबार बसेको मन्त्रिपरिषद्को बैठकले ‘प्रकोप पीडित उद्धार र राहत सम्बन्धी मापदण्ड, २०६४’ लाई समसामयिक संशोधन गरी ‘विपद् पीडित उद्धार र राहत सम्बन्धी मापदण्ड, २०७७’ स्वीकृत गरेसँगै पीडितलाई राहत दिन लागिएको हो ।

पीडित परिवारमा मृत्यु भएकालाई दुई लाख राहत र घर बनाउन १ लाख रुपैयाँ पनि दिने सरकारको निर्णय छ । घरका एक जनालाई भनिएपनि परिवारका धेरैजनाको विपद्कै कारण ज्यान गएमा के हुने ? भन्ने उल्लेख छैन ।

मन्त्रालयले घर, बहाल, आवास, खाद्यान्न बाली तथा जग्गा जमीन वा पसल व्यवसायमा समेत नोक्सानी भएमा तत्कालका लागि पाँच जनाको परिवार भएमा १५ हजार र सो भन्दा बढी भएमा २० हजार रुपैयाँ राहत उपलब्ध गराउने भएको छ।

पछिल्लो तथ्यांकअनुसार गएको बैशाखदेखि साउन पहिलो हप्तासम्म बाढी तथा पहिरोमा परेर १ सय २९ जना र चट्याङले ४७ जनाको मृत्यु भएको छ ।