अमेरिकी शहरहरुमा संघीय सुरक्षाकर्मी परिचालन गर्दै ट्रम्प

८ साउन, एजेन्सी । अमेरिकी राष्ट्रपति डोनाल्ड ट्रम्पले हिंसात्मक गतिविधि बढेको भन्दै विभिन्न शहरहरुमा ठाउने भएका छन् ।  डेमोक्र्याटिक पार्टीको सत्ता रहेका शहरहरुलाई निशाना बनाएर अपराध नियन्त्रणका नाममा सयौँ संघीय सुरक्षाकर्मी उनले पठाउन लागेका हुन् । शिकागो र डेमोक्र्याटको सत्ता रहेका अरु दुई शहर ट्रम्पको निशानामा छन् ।

तर पोर्टल्याण्ड, ओरिगनसहितका शहरमा संघीय सुरक्षाकर्मीको तैनाथि विवादास्पद बनेको छ । स्थानीय अधिकारीले जारी प्रदर्शन र संघीय सुरक्षाकर्मीको तैनाथिले थप तनाव बढेको भन्दै चासो व्यक्त गरेका छन् ।

आउँदो नोभेम्बरमा हुने राष्ट्रपति चुनावमा पुनः निर्वाचित हुने प्रयासमा रहेका ट्रम्पले ‘ल एण्ड अडर’ लाई आफ्नो चुनावी अभियानको प्रमुख सहाराका रुपमा लिएका छन् ।

गएको मे २५ मा मिनेशोटाको मिनियापोलिशमा प्रहरीको ज्यादतीका कारण निहत्था अश्वेत व्यक्ति जर्ज फ्लोइडको निधन भएपछि प्रदर्शन हुँदै आएको बीबीसीले समाचारमा उल्लेख गरेकाे छ ।

यस्तै महानगर क्षेत्रमा पछिल्लो समय गोलीकाण्डहरु बढेका छन् । न्यूयोर्क सिटी, फिलाडेलफिया, लस एन्जलस, शिकागो, मिल्वाकीसहितका शहरमा गोलीकाण्डका घटना बढेका हुन् । ट्रम्पले बुधबार हिंसा नियन्त्रणमा लिनका लागि भन्दै ‘अपरेशन लेजेण्ड’ को घोषणा गरेका हुन् ।

यो अपरेशनमा संघीय अनुसन्धान व्युरो ‘एफबिआई’, मार्शल सर्भिससहितका अरु संघीय एजेन्सीका सुरक्षाकर्मी तथा अधिकारीहरु सामेल हुने छन् । गएको जुनमा कान्सस सिटीमा घरमा सुतिरहेका बेला चार वर्षका बालक लेजेन्ड टालिफेरोमाथि गोली प्रहार भएको थियो । गोली लागेर निधन भएका ती बालककी आमाको साथमा ट्रम्पले बुधबार अपरेशन लेजेण्ड घोषणा गरेका हुन् ।

ट्रम्पले डेमोक्र्याटहरुले अपराधलाई गम्भीर रुपमा नलिएको आरोप लगाउने गरेका छन् । पछिल्लो समय प्रहरी सेवालाई विस्थापित गर्न वा ध्वस्त पार्न डेमोक्र्याट लागेको आरोप ट्रम्पले लगाएका छ्न । तर डेमोक्र्याटले भने प्रहरी सेवामा सुधारको खाँचो रहेको बताउने गरेका हुन् ।