दुई चिकित्सकसहित पर्साका थप १६ जनालाई कोरोना संक्रमण पुष्टि

८ साउन, वीरगञ्ज । पर्साका १७ जनालाई कोरोना संक्रमण देखिएको छ । नारायणी अस्पतालको पीसीआर प्रयोगशालामा गरिएको परीक्षणमा १७ जनामा संक्रमण पुष्टि भएको हो ।

बुधबार राति आएको रिपोर्टमा दुई जना चिकित्सकमा समेत कोरोना संक्रमण देखिएको छ । गण्डकमा मृत्यु भएका वृद्धसहित १७ जनामा कोरोना संक्रमण पुष्टि भएको नारायणी अस्पतालको पीसीआर प्रयोगशालाले जानकारी दिएको छ ।

एक सय २८ वटा नमुना परीक्षण गर्दा ४ जना महिलासहित १७ जनामा कोरोना संक्रमण पुष्टि भएको ल्याब प्रमुख प्याथोलोजिस्ट डाक्टर निरा पाठकले बताइन् ।

नारायणी अस्पतालमै कार्यरत ४७ वर्षीय चिकित्सक, दुई वर्ष पहिले अवकाश पाइसकेका ६० वर्षीय चिकित्सकमा पनि कोरोना संक्रमण पुष्टि भएको छ । संक्रमितमा लक्षण खासै नदेखिएको पनि अस्पतालले जनाएको छ ।