न्यायाधीशमाथि महाअभियोग लगाउन बाबुरामको माग

९ साउन, काठमाडौं । अपराधलाई संरक्षण गर्ने न्यायाधीशमाथि महाअभियोग लगाउन पूर्वप्रधानमन्त्री डा. बाबुराम भट्टराईले माग गरेका छन् । पूर्वडीआईजी रञ्जन कोइराला रिहा भएको भोलिपल्टै सामाजिक सञ्जाल ट्वीटरमा ट्वीट गर्दै भट्टराईले अपराधलाई संरक्षण गर्ने र दोषीको सजाय छुट गर्ने न्यायाधीशमाथि महाअभियोग लगाउन माग गरेका हुन् ।

समाजवादी पार्टीका अध्यक्ष रहेका भट्टराईले ट्वीटरमा लेखेका छन, ‘देश गम्भीर संकटतिर जाँदैछ। लोकतान्त्रिक ढंगले संकटमोचन गर्न संसद अधिवेशन बोलाऊँ, ओली सरकार विदा गरेर नेकपाभित्रैबाट नयाँ चयन गरौं, अपराधका संरक्षक न्यायाधीशमाथि महाभियोग लगाऊँ, भ्रष्टाचार रोक्न शक्तिशाली लोकपाल गठन गरौं, प्रत्यक्ष निर्वाचित कार्यकारी राष्ट्रपतिमा जाऊँ ।’

यसअघिदेखि नै वर्तमान सरकारसँग असन्तुष्ट रहदै आएका भट्टराईले पटक पटक प्रधानमन्त्री ओलीको राजीनामा माग गर्दै आएका छन् ।