महासंघको चुनाव स्थगित गरिएकोमा ढकाल पक्षको आपत्ति

९ साउन, काठमाडौं । कोरोना महामारीको कारण देखाउँदै नेपाल उद्योग वाणिज्य महासंघको चुनाव सारिएपछि बरिष्ठ उपाध्यक्षका उम्मेद्वार चन्द्र ढकाल समूहले आपत्ति जनाएको छ ।

वर्तमान उपाध्यक्ष ढकालले कोरोना कारण देखाउदै महासंघको चुनाव सारिएकोमा असन्तुष्टि जनाएका हुन् । बिहीबार बसेको महासंघको पदाधिकारी बैठकले आगामी २६ र २७ गतेका लागि चुनाव तय भएको थियो ।

तर कोरोनाले चुनावी गतिविधि गर्न नसकिने भन्दै महासंघको चुनाव स्थगित भएको हो । वरिष्ठ उपाध्यक्ष पदका अर्का उम्मेद्वार किशोर प्रधान पक्षका उम्मेद्वारहरुले पराजय हुने डरले चुनाव सारेको ढकाल पक्षले आरोप लगाएको छ ।

चुनाव सार्ने निर्णय कार्यसमिति बैठकले गर्नु पर्नेमा पदाधिकारी बैठकले गरिनु गलत भएको ढकाल समूहको आरोप छ । अर्का उम्मेद्वार किशोर प्रधानलाई भावी अध्यक्ष शेखर गोल्छाको साथ रहेकाले मिलेर योजनाबद्ध ढंगबाट चुनाव सारिएको पनि ढकाल पक्षको आरोप छ ।

कोरोनाका कारण सारिएको चुनाव अब कहिले हुने भन्ने एकिन छैन् । यद्यपी भदौदेखि लकडाउन पूर्णरुपमा खुलेपछि भदौ १५ तिर चुनाव गर्ने योजना महासंघको छ ।