सरकार कोरोना रोकथामका लागि काम गर्दैन, भ्रम मात्रै छर्छ : महत

९ साउन, काठमाडौं । सरकारले कोरोना परीक्षणको दायरा घटाएर भ्रम छरेको नेपाली कांग्रेसले आरोप लगाएको छ । कांग्रेसको कोभिड १९ अनुगमन समितिले शुक्रबार पत्रकार सम्मेलन गर्दै कोरोनाबारे सरकारले काम गर्ने भन्दा भ्रम छर्ने गरेको बताएको हो ।

पटक पटक ध्यानाकर्षण गराउँदा पनि परीक्षणको दायरा फराकिलो नपारिएको कांग्रेसको ठहर छ । परीक्षणको दायरा घटाएर जोखिम कम भएको भन्दै काग्रेसले सरकारको कदममा आपत्ति समेत जनाएको छ ।

कांग्रेसको कोरोना अनुगमन समितिका संयोजक डा. प्रकाशशरण महतले पत्रकार सम्मेलनमा भने ‘उल्टो परिक्षणको दायरा घटाएर संक्रमणको जोखिम कम भएको भ्रामक प्रचार गरिरहेको छ ।’

सरकारले लडाउनको अवधिलाई महामारी नियन्त्रण र यसपछि जनजीवन सहज बनाउनेतर्फ पनि ध्यान नदिएको कांग्रेसको भनाई छ ।