प्रधानमन्त्री ओली र कांग्रेस सभापति देउवाबीच लगातार भेटवार्ता

९ साउन, काठमाडौं । प्रधानमन्त्री केपी शर्मा ओली र कांग्रेस सभापति शेरबहादुर देउवाबीच आज पनि भेटवार्ता भएको छ । बालुवाटारमा भएको भेटमा समसामयिक राजनीतिका बारेमा छलफल भएको नेताहरुले बताएका छन् ।

यसअघि दुई नेताबीच हिजो पनि भेटवार्ता भएको थियो । पछिल्लो समय सत्तारुढ नेकपाभित्रको विवाद मिल्न नसकेका बेला प्रधानमन्त्री ओली र विपक्षी कांग्रेस सभापति देउवाबीच निरन्तर छलफल तथा भेटवार्ता भइरहेको हाे ।

आजको भेटमा नेकपा संसदीय दलका उपनेता सुवास नेम्वाङ र कांग्रेस केन्द्रिय सदस्य रमेश लेखक पनि सहभागी थिए । यसअघि ओली र देउवाबीच एक्लाएक्लै भेटवार्ता भएपनि आज भने नेम्वाङ र लेखक पनि सहभागी रहेकाे नेताहरुको भनाई छ ।

पछिल्लो समय नेताहरुबीचमा संवैधानिक आयोगमा कसलाई कसरी नियुक्ती गर्ने भन्ने विषयमा छलफल गरिएको भनिएपनि सत्ता समीकरणका विषयमा समेत छलफल भइरहेको अनुमान गरिएको छ ।

यसअघि पनि ओली र देउवाबीच सत्ता समीकरणका विषयमा छलफल भएको थियो । जसले नेकपा र कांग्रेसभित्रै आन्तरिक विवाद उत्पन्न भएको थियो ।