महामन्त्री खड्का भन्छन्, कोरोना नियन्त्रणमा प्रभावकारी काम हुन सकेन 

१० साउन, काठमाडौं । नेपाली कांग्रेसका महामन्त्री पूर्णबहादुर खड्काले सरकारले कोरोना नियन्त्रणमा प्रशस्त समय पाए पनि प्रभावकारी रुपमा काम गर्न नसकेको बताए छ । कांग्रेसको तरुण विभागले आज यहाँ आयोजना गरेको ‘नवनियुक्त विभागका सदस्यको शपथग्रहण’ कार्यक्रममा उनले सरकारले जनताको अपेक्षाअनुसार काम गर्न नसकेको आरोप लगाए ।

उनले भने, “सरकार कोरोना नियन्त्रणभन्दा पार्टीभित्रको आपसी झगडामा रुमल्लिएको छ ।” सरकारले जनतालाई राहत, क्वारेन्टाइन, औषधि उपचारको राम्रो व्यवस्था गर्न नसकेको उनको भनाइ छ । महामन्त्री खड्काले पार्टीको मेरुदण्ड तरुण विभाग भएको बताउँदै विभागले पार्टीको सिद्धान्त, आदर्शलाई युवामाझ लैजाने विश्वास व्यक्त गरे । पार्टीभित्र गुठको समस्या देखिएको भएको भन्दै उनले सबै मिलेर पार्टीलाई सुधार गर्नुपर्ने उल्लेख गरे।

कांग्रेसका केन्द्रीय सदस्य एवं तरुण विभाग प्रमुख शङ्कर भण्डारीले व्यक्तिलाई होइन पार्टीलाई बलियो बनाउन तरुण विभाग लाग्नुपर्ने बताए । “देशभरका युवालाई विभागले गोलबन्द गरेर सरकारको गलत क्रियाकलापविरुद्ध खबरदारी गर्नुपर्छ”, उनले भने । नेता भण्डारीले सङ्गठन विस्तार र मुलुकको समृद्धिका लागि विभागले काम गर्ने उल्लेख गरे । भर्खरै विस्तार भएको तरुण विभागमा संयोजकसहित २४ सदस्य मनोनित गरिएको छ ।