बालुवाटारमा ओलीको छुट्टै परामर्श, गृहसचिवको ‘इन्ट्री’ !

१२ साउन, काठमाडौं । भोलि बस्ने सत्तारुढ नेकपा स्थायी कमिटी बैठकको रणनीतिका लागि प्रधानमन्त्री केपी शर्मा ओलीले बालुवाटारमा परामर्श गरिरहेका छन् । खुमलटारमा अर्का अध्यक्ष प्रचण्डले विशेष रणनीति नै बनाएपछि ओलीले पनि आफू निकट नेताहरुसँग परामर्श थालेका हुन् ।

बालुवाटारमा बिहान संसदीय दलका उपनेता सुवासचन्द्र नेम्वाङसँग ओलीले विशेष परामर्श गरेका हुन् । बिहान झण्डै १० बजेदेखि ११ बजेसम्म नेम्वाङ र ओलीबीच भोलिको बैठकका विषयमा छलफल भएको बालुवाटार स्रोतले जनाएको छ ।

ओली र नेम्वाङबीचको बैठकमा गृहसचिव महेश्वर न्यौपाने पनि सहभागी भएको स्रोतको दाबी छ । झण्डै एक घण्टा ओली, नेम्वाङ र न्यौपानेबीच विशेष छलफल भएको हो । यसरी हेर्दा ओलीको राजनीतिक तथा रणनीतिक छलफलमा गृहसचिव महेश्वर न्यौपानेको पनि ‘इन्ट्री’ भएको देखिन्छ । जुन ओलीको अबको सम्भावित रणनीतिमा सुरक्षा संयन्त्र परेको र यसले पनि नेकपाभित्रमा केही हलचल ल्याउने अनुमान छ ।

यसअघि नेकपाका वरिष्ठ नेता माधवकुमार नेपालले आफूहरुलाई प्रधानमन्त्री ओलीले पक्राउ गरेर थुन्ने योजना बनाएको सार्वजनिक रुपमै बताएका थिए । खासगरी नेकपाका वरिष्ठ नेताहरुलाई सुरक्षा संयन्त्र प्रयोग गरेर शक्ति देखाउने योजनामा प्रधानमन्त्री ओली रहेको नेता नेपालको दाबी थियाे ।

यद्यपि प्रधानमन्त्री ओली र गृहसचिव न्यौपानेबीचको आन्तरिक छलफलका विषयमा खास तथ्य बाहिर आइसकेको छैन् । तर भोलिको बैठकमा प्रचण्ड र माधव नेपाल पक्ष विशेष रुपमै रणनीति बनाएर आउने देखिएपछि ओली पनि आन्तरिक रुपमा बलियो भएर योजनाका साथ बस्ने देखिएका छन् ।