आत्महत्या गर्न लागेकालाई प्रहरीले जोगायो, फेसबुकले दियो जानकारी !

१३ साउन, काठमाडौं । जीन्दगीदेखि विरक्तिएर आत्महत्या गर्छु भन्दै फेसबुकमा लेख्ने सुनिल अग्रवाललाई प्रहरीले उद्धार गरेको छ । महानगरीय प्रहरी वृत्त, महाराजगञ्ज र प्रहरी प्रभाग, बसपार्कको टोलीले झापाको अनारमनी–४ घर भएका अग्रवाललाई सोमबार उद्धार गरेको हो ।

सोमबार बिहान साढे ११ बजे उनले फेसबुकमा आत्महत्या गर्ने पोष्ट हालेका थिए । यतिसम्म कि उनले आफ्नो मृत्युको खबर घरमा नपठाउन पनि भनेका थिए । तर समयमै प्रहरीसम्म पुग्दा उनलाई आत्महत्या गर्नबाट जोगाइएको छ ।

फेसबुक पोष्टबारे जानकारी पाउनेवित्तिकै प्रहरीले उनलाई खोजी गर्दा गोंगबु बसपार्कको पश्चिम लुम्बिनी गेस्ट हाउसको ३०१ नम्बर कोठामा भेट्टाएको थियो । लगत्तै उनलाई उद्दार गरेर काउन्सिलिङ गर्दा उनी डिप्रेसनको शिकार भएको प्रहरीले जनाएको छ ।

घर परिवारसँग राम्रो सम्बन्ध नरहेका कारण उनी आत्महत्या गर्ने निष्कर्षमा पुगेका थिए । प्रहरीले उद्धार गरेर परामर्शका साथ परिवारको जिम्मा लगाएको छ ।