समृद्धिको सपना र स्थिरताको नारा बोकेको सरकार निर्वस्त्रः नेता केसी

१४ साउन, काठमाडौं । नेपाली कांग्रेसका केन्द्रीय सदस्य तथा पूर्वमन्त्री अर्जुन नरसिंह केसीले समृद्धिको सपना र स्थिरताको नारा बोकेको सरकार निर्वस्त्र देखिएको आरोप लगाएका छन् ।

सामाजिक सञ्जाल ट्वीटरमा लेख्दै नेता केसीले नेकपा विवाद पुष्पकमल दाहाल प्रचण्डको उच्चस्तरीय संयन्त्रको माग र प्रधानमन्त्री केपी शर्मा ओलीको अध्यादेशपछि आजसम्म ६ महिना नाघेको बताएका छन् ।

पार्टी एकतापछि नेकपाभित्र देखिएको यो विवाद अहिलेसम्मकै चरम बन्दै गएकाे छ । विवाद मिलाउनकै लागि कैयौंपटक नेताहरूबीच गुटका छुट्टाछुट्टै भेला भएपनि विवाद अझै चरममा पुगेकाे छ  । बीचमा नेताहरूबीच घनीभूत छलफल गरेर निचोड निकाल्ने भनिए पनि परिस्थिति झन् बिग्रिएपछि अध्यक्षद्वय आआफ्नो समूह बलियो बनाउने ध्याउन्नमा लागेका छन् ।

उनले भनेका छन्, यो बीच कोरोना संकट, प्राकृतिक प्रकोप, जनजीवनका दयनीय समस्या र राष्ट्रिय दायित्व सरकारको विषयनै बनेन। समृद्धिको सपना र स्थिरताको नारा बोकेको यो सरकार निर्वस्त्र देखिएको छ।

पछिल्लो समय समृद्धिप्रतिको सरकारको संकल्पप्रति नै अविश्वासको स्थिति सिर्जना हुन लागिसकेको छ । सरकार प्रमुखको हरेक सम्बोधनमा समृद्ध नेपाल निर्माण गर्ने संकल्प आउँछ, तर कथा पुरानै छ, व्यथा पुरानै छ । आखिर गाँठो कहाँ परेको छ ? राज्य हरेक ढंगबाट असुरक्षित हुँदै गएको वर्तमान परिस्थितिमा जनताले ओलीको छनोटमाथि नै प्रश्न गर्न थालेका छन् । यत्तिको प्रतिवद्धता हुँदाहुँदै पनि परिवर्तनको आभाष हुन नसक्नुमा कमजोर को ? ओली ? ओलीको टीम वा अन्य कोही ? यो आजको गम्भीर प्रश्न हो, नेता केसीले भनेका छन् ।