मास्क नलगाई हिडडुल गर्ने १२३ जना प्रहरी नियन्त्रणमा

◊ धीरुभाइ

१४ साउन, सप्तरी । मास्क नलगाई सार्वजनिक स्थलमा हिडडुल गर्ने १२३ जनालाई सप्तरी प्रहरीले नियन्त्रणमा लिइ कारबाही गरिएको छ ।  जिल्ला प्रशासन कार्यालय सप्तरीले कोरोना भाइरस संक्रमण नियन्त्रण तथा रोकथामका लागि सार्वजनिक स्थलमा मास्क नलगाई हिलडुल गर्नेलाई कारवाही गर्ने दुई दिन अघि जारी गरेको सूचनालाई अटेर गरी हिडडुल गरेपछि नियन्त्रणमा लिएका प्रहरीले बताइएको छ ।

राजविराज नगरस्थित महाबीर स्थान, गजेन्द्र चौक, शहिद चौक, रुपनी मोड तथा कन्चनरुप नगरपालिका लगायतका स्थानहरुबाट उनीहरुलाई नियन्त्रणमा लिइएको प्रहरीले जनाएको छ । हाट, बजार र पूर्व–पश्चिम राजमार्गबाट नियन्त्रणमा लिइएका १२३ जनाबाट प्रतिव्यक्ति एक सय रुपैयाँ जरिवाना तिराएर छाड्ने गरेको जिल्ला प्रशासन कार्यालय, सप्तरीले जनाएको छ । सो जरिवाना वापत १२ हजार ३०० राजस्व सङ्कलन भएको प्रशासकीय अधिकृत आनन्द ठाकुरले बताए ।

जिल्ला प्रशासन कार्यालय सप्तरीले संक्रमण नियन्त्रणका लागि गत आइतबार सूचना जारी गरी अनिवार्य रुपमा मास्क प्रयोग गर्न भनिएको थियो । सूचनामा मास्क नलगाउनेलाई कारवाही गर्ने चेतावनी समेत दिएको थियो ।

सूचना जारी गरेर दुई दिन आइतबार र सोमबार मास्क नलगाई सार्वजनिक स्थलमा हिलडुल गर्नेलाई सचेत गराइएको थियो । तरपनि वेवास्ता गरिएको पाइएपछि कारवाही थालिएको प्रहरीले बताइएको छ ।