नेपाल प्रहरीको केन्द्रीय प्रवक्तामा कुवेर कडायत

१४ साउन, काठमाडौं । नेपाल प्रहरीको केन्द्रीय प्रवक्ताको जिम्मेवारी कुवेर कडायतलाई दिइएको छ। प्रहरी वरिष्ठ उपरीक्षक ‘एसएसपी’ कडायतले बुधबारबाट प्रवक्ताको जिम्मेवारी सम्हालेका छन्।

यसअघिका प्रवक्ता निरज शाही अतिरिक्त महानिरीक्षक ‘एआईजी’ मा बढुवा भएपछि प्रधान कार्यालयले नयाँ प्रवक्ता तोकेको हो। कडायत यसअघि प्रहरीको सह प्रवक्ताको जिम्मेवारीमा थिए।

प्रहरी प्रवक्ता डीआईजी हुने भएपनि तीन डीआईजी रिक्त रहेकाले बढुवा नहुन्जेल कडायतले प्रवक्ताको जिम्मेवारी सम्हाल्नेछन्।

नेपाल प्रहरीद्वारा सम्पादित जनसरोकारका काम कारवाहीलाई यथार्थ तथा तथ्यगत रुपमा सञ्चार माध्यमहरूमा सम्प्रेषण गर्नका लागि प्रहरी वरिष्ठ उपरीक्षक कडायतलाई केन्द्रीय प्रहरी प्रवक्ता तोकिएको उक्त सचिवालयले जनाएको छ ।केन्द्रीय प्रहरी प्रवक्ता प्रहरी वरिष्ठ उपरीक्षक कडायतलाई मोबाइल नम्बर ९८५१२९२१११ र ईमेल ठेगाना [email protected] मा सम्पर्क गर्न सकिने छ ।