कमलादीबाट बरामद भएको १५ किलो सुनमा प्रहरीको लापरबाही

१५ साउन, काठमाडौं । केही दिनअघि कमलादीबाट बरामद भएको सुनचाँदीमा प्रहरीको गम्भिर लापरबाही देखिएको छ । कमलादीबाट सुन भन्दै बरामद भएको चाँदी र केही सुन रहेको धाँतुमा काठमाडौं प्रहरी परिसर र महानगरीय प्रहरी वृत्त, दरबारमार्गले लापरबाही गरेर नक्कली घटनास्थल तयार पार्न खोजेको पनि देखिएको छ ।

घटना विवादमा तानिएपछि महानगरीय प्रहरी कार्यालय रानीपोखरीले एसएसपी मनोज यादवको नेतृत्वमा छानबिन समिति गठन गरेको थियो । समितिले थालेको अनुसन्धानमा महानगरीय प्रहरी वृत्त, दरबारमार्गका डीएसपी रञ्जन दाहालले घटनास्थल परिवर्तन गरेर प्रहरीको माथिल्लो निकायलाई थाहै नदिएको पाइएको छ । दरबारमार्गले घटनालाई रहस्यमय राखेर फाइदा लिन खोजेको पनि देखिएको छ ।

यसअघि हिजो मंगलबार मात्रै काठमाडौं प्रहरी प्रमुख एसएसपी श्यामलाल ज्ञवालीले कमलादीको नबिल बैंक अगाडिबाट कपडाको झोलाबाट सुन बरामद भएको र गाडी फरार रहेको बताएका थिए । पत्रकार सम्मेलन नै गरेर उनले यसबारे जानकारी गराउँदा वास्तविकता त्यस्तो केही नभेटिएको पाइएको छ ।

जसले गर्दा घटनाक्रमबारे गलत जानकारी दिइएको पाइएको छ । सीसी टिभी क्यामेरा हेर्दा कमलादीबाट नभई सुन्धाराबाट सुन बरामद भएको आशंका गरिएको छ । यसबारे थप अनुसन्धान भइरहेको प्रहरीको भनाई छ ।

सुन बरामद गरिएपनि यसबारे माथिल्लो निकायलाई जानकारी नदिएको र फरार तस्करको खोजीका लागि सीमानाकालाई पनि खबर नगरेको पाइएको छ । जसले दरबारमार्गका डिएस्पी रञ्जन दाहालको संलग्नता गम्भिर भएको पाइएको हो ।

प्रहरीले गाडीबारे दिएको जानकारी पनि गलत रहेको पाइएको छ । यसबारे थप अनुसन्धान भइरहेकाले अब अन्तिम छानबिन टुंगो लागेर प्रतिवेदन सार्वजनिक गर्दा मात्रै सबै तथ्य खुल्ने अनुसन्धानरत अधिकारीहरुको भनाई छ ।