कमलादीमा सुन छाडेर भाग्ने तीन जना दुम्कीबासबाट पक्राउ

१५ साउन, काठमाडौं । कमलादीबाट १५ किलो ‘सुन’ भनेर बरामद गरेको पहेँलो धातुसम्बन्धी प्रकरणमा फरार भनिएका तीन जना पक्राउ परेका प्रहरीले जनाएको छ । पूर्वी नवलपरासीको दुम्कीबासबाट देवान पटेल, विजय पटेल र निलेश सखियालाई प्रहरीले पक्राउ गरेको हो ।

स्कार्पियोमा सामान ल्याएको अवस्थामा पक्राउ परेका उनीहरु काठमाडौँबाट भागेर त्यहाँ पुगेको अनुमान छ । यही साउन १३ गते प्रहरीले कमलादीस्थित नबिल बैंक अगाडिबाट १५ किलो पहेँलो धातु बरामद गरेको जनाएको थियो । सेतो रंगको कपडाको झोला फ्याँकेर एक गाडी फरार भएको र सो झोलामा १५ किलो पहेँलो धातु भेटिएको प्रहरीको भनाइ थियो ।

तर सो घटना अनुसन्धानको क्रममा प्रहरीले नक्कली घटनास्थल बनाएको खुलेको थियो । महानगरीय प्रहरी वृत्त, दरबारमार्गका डीएसपी रञ्जन दाहालमाथि घटनास्थल परिवर्तन गरेको, माथिल्लो निकायलाई गुमराहमा पारेको र अभियुक्तलाई भगाएको आरोप लागेको छ । यस विषयमा प्रहरीले थप अनुसन्धान गरिरहेको छ ।