६ सय प्रतिशतले बढ्यो तरकारीको मूल्य !

१५ साउन, काठमाडौं । लकडाउनपछि काठमाडौंमा तरकारीको मुल्य ह्वात्तै बढेको छ । आलु, गोलभेडा, काउली, भण्टादेखि धनियाँ लगायतको मूल्य हुवात्तै बढेको हो । केही तरकारीको मूल्य त ६ सय प्रतिशतसम्म बढेको हो । कालीमाटी तरकारी बजारले तोक्ने थोक मूल्य र उपभोक्ताले खरिद गर्ने हरेक तरकारीको मूल्यमा धेरै अन्तर छ ।

कालीमाटी फलफूल तथा तरकारी बजार विकास समितिले तरकारीको मूल्य तोक्ने गर्छ । असार १ देखि साउन १५ सम्म विभिन्न ४१ तरकारीको मूल्य तोकिएको छ । यसबीचमा लगभग सबै तरकारीको मूल्य आकाशिएको छ । भान्सामा अति आवश्यक आलुको मूल्य थोकमै ७० देखि १०९ प्रतिशतसम्म मूल्य बढेको छ ।

असारमा ३३ रुपैयाँ किलोमा थोक बिक्री भएको रातो आलुको भाउ साउन १४ मा प्रतिकिलो ६९ रुपैयाँ पुगेको छ । यस्तै मुडेको आलु सोही सामयमा ३४ रुपैयाँ किलोमा पाइने मुडेको आलु प्रतिकिलो ५८ रुपैयाँसम्म पुगेको छ ।

यस्तै हरियो धनियाँको मूल्य सबै भन्दा धेरै ६८४ प्रतिशतले बढेको छ । असार एकमा प्रतिकिलो ६५ रुपैयाँ रहेको हरियो धनीयाको भाउ साउन १४ मा पाँच सय १० रुपैयाँ पुगेको छ । अकबरे खुर्सानी, भारतीय प्याज, गाँजर, बन्दा, काउली, मुलालगायतको मूल्य थोक बजारमै बढेको छ ।

अधिकांश तरकारीको मूल्य बढे पनि यस अवधिमा कुरिलो, न्यूरो, चुकुन्दर, पुदिना, तामा, इमली, तोफु, गुन्द्रुकलगायतको तरकारीको मूल्य भने थोक बजारमा स्थिर छ । असार १ मा २५५ रुपैयाँ प्रतिकिलोमा बिक्री भएको कुरिलोको भाउ साउन दोस्रो सातासम्म पनि उस्तै छ ।

यस अवधिमा निगुरो प्रतिकिलो १०५ रुपैयाँ, चुकुन्दर ५५, इमली १३५ र तामा ११५ रुपैयाँ मूल्य रहेकोमा खुद्रामा पनि खासै भाऊ नबढेको कालीमाटी तरकारी बजार विकास समितिले जनाएको छ ।