मन्त्री भट्टलाई ज्यान मार्ने धम्की !

१५ साउन, काठमाडौं । एमसिसीका विषयमा उद्योगमन्त्री लेखराज भट्टलाई ज्यान मार्ने धम्की आएको छ । बझाङबाट एक व्यक्तिले फोन गरेर ‘जहाँ भेट्यो त्यही ‘टाउको काट्छु’ भन्दै धम्की आएको मन्त्री भट्टले बताएका छन् ।

‘मलाई बझाङबाट फोन गरेर एकजनाले एमसीसीको पक्षमा बोले जहाँ भेट्यो त्यहीँ टाउको काट्छु भनेर धम्की दिनु भएको छ । मैले एमसीसीबारे के अध्ययन गर्नुभएको छ भनेर सोध्दाचाहिँ उहाँले थाहा छैन भन्नु भयो’ उनले भने ।

संसदको उद्योग, बाणिज्य, श्रम तथा उपभोक्ता हित समितिमा नेटवर्किङ बिजनेश बारेको छलफलमा बोल्दै मन्त्री भट्टले यस्तो बताएका हुन् । अहिले नेटवर्किङ व्यवसायमा पनि एमसीसीमा जस्तै मान्छेले बुझ्दै नबुझी विभिन्न टिकाटिप्पणी गरिरहेको उनले दावी गरे ।

बैठकमा सांसदहरुले विगतमा नेटवर्किङ व्यवसायबाट धेरै पीडित भएको सन्दर्भ कोट्याउँदै अहिले फेरि मन्त्रालयले कमिसनको चक्करमा सोही व्यवसायलाई स्वीकृति दिएको हो भन्दै प्रश्न गरेका थिए ।

संसदले नै ०७४ सालमा नेटवर्किङ व्यवसाय सञ्चालनका लागि कानुन बनाएकाले अहिले मन्त्रालयले कार्यान्वयन गरेकाले त्यसमा कमिसनको चक्कर रहेको भन्ने प्रश्नै नरहने उनको दावी छ। नेटवर्किङ व्यवसायको जालो अहिले पनि फैलिएको भन्दै त्यसलाई नियन्त्रण गर्नुपर्ने बताएका हुन् ।