सुन प्रकरणमा मुछिएका डीएसपी रञ्जनलाई दरबारमार्गबाट हटाइयो

१५ साउन, काठमाडौं । कमलादीबाट बरामद भएको सुन प्रकरणमा मुछिएपछि महानगरीय प्रहरी वृत्त दरबारमार्गका प्रमुख डीएसपी रञ्जन दाहाललाई जिम्मेवारीबाट हटाइएको छ ।

१५ किलो ‘सुन’ भनेर बरामद भएको पहेँलो धातु प्रकरणमा मुछिएका दाहाललाई छानविनका लागि महानगरीय प्रहरी वृत्त दरवारमार्गको नेतृत्वबाट हटाइएको हो । उनको ठाउँमा डीएसपी रामशरण पौडेललाई पठाइएको छ ।

दुई दिनअघि कमलादीको नबिल बैंक अगाडिबाट १५ किलो पहेँलो धातु प्रहरीले बरामद गरेको दाबी गरेको थियो । तर त्यो धाँतु बोकेको गाडी फरार रहेको भन्दै प्रहरीले झुटो जानकारी बाहिर ल्याएको थियो । यस प्रकरणमा लापरबाही देखिएपछि प्रहरीले अहिले डिएसपी दाहालमाथि छानिबन गरिहेको छ ।

प्रहरीले सुनसहितको धाँतु छाड्ने तीन जना र स्कार्पियो गाडी समातिसकेको छ । घटनाका विषयमा थप अनुसन्धान भइरहेको छ । यसअघि पनि दरबारमार्गका इन्सपेक्टर बलात्कार मुद्दामा आरोपितलाई प्रलोभनमा परेर उन्मुक्ति दिएको भन्दै कारबाहीमा परेका थिए ।