नेपालगन्जमा फेरि निषेधाज्ञा

१५ साउन, बुटवल । कोरोना फेरि भयावह अवस्थामा प्रवेश गरेपछि बाँकेको नेपालगन्जमा तीन दिनसम्मका लागि निषेधाज्ञा जारी गरिएको छ । पछिल्लो पटक पीसीआर परीक्षण गर्दा धेरै व्यक्तिमा कोरोना पोजेटिभ देखिएपछि तीन दिनसम्म निषेधाज्ञा जारी गर्ने निर्णय भएको हो ।

नेपालगन्जमा बिहीबार बसेको बाँके जिल्लास्तरीय कोरोना संकट व्यवस्थापन केन्द्र सीसीएमसीको बैठकले आइतबारदेखि निषेधाज्ञा जारी गर्ने निर्णय गरेको प्रमुख जिल्ला अधिकारी रामबहादुर कुरुम्बाङले बताए ।

‘शुक्रबार र शनिबार उच्च सतर्कता अपनाउँदै पहिलो चरणमा आइतबारदेखि तीन दिनसम्म नेपालगन्जका सबै वडामा तीन दिनसम्म पूर्णरुपमा निषेधाज्ञा लगाउने निर्णय भएको प्रजिअ कुरुम्बाङले बताए । नेपालगन्जमा बिहीबार बिहान मात्रै २७ जनामा कोरोना पुष्टि भएको थियो ।

भेरी अस्पताल नेपालगन्जमा भएको परीक्षणमा नेपालगन्जका २० जना र बाहिर जिल्लाबाट आएर बसेका ७ जना सरकारी कर्मचारीमा कोरोना पुष्टि भएको हो ।