निजी अस्पताललाई कोरोना बिरामीको उपचार गर्न दिइने, तर शुल्क महंगो !

१५ साउन, काठमाडौं । कोरोना उपचार गरेबापत निजी अस्पतालले दैनिक १५ हजारसम्म शुल्क लिन पाउने निर्णय सरकारले गरेको छ । स्वास्थ्य तथा जनसंख्या मन्त्रालयका प्रवक्ता डा। जागेश्वर गौतमले जटिल अवस्थाका बिरामीको उपचार गर्दा निजी अस्पतालले १५ हजार रुपैयाँसम्म लिन पाउने निर्णय भएको बताएका हुन् ।

कोरोना संक्रमितको उपचारका लागि सरकारले लेबल १, २ र ३ गरी तीन थरी अस्पताल तोकेको छ । यीबाहेक अन्य निजी अस्पतालमा बिरामीले कोरोना संक्रमणको उपचार गराउन चाहेमा उक्त अस्पतालको समेत सहमति लिई उपचार गर्न पाउनेछन् ।

यसरी उपचार गर्दा संक्रमित सामान्य अवस्थाको भए प्रतिदिन ३ हजार ५ सय रुपैयाँ, मध्यम जटिल खालको भए ७ हजार र जटिल तथा क्रिटिकल अवस्थाको भए १५ हजार रुपैयाँ नबढाई लिन पाउने बताए ।

यस्तै सरकारले कोरोना परीक्षण गर्दा निजी अस्पतालले बिरामीबाट १० प्रतिशतसम्म सेवा शुल्क पनि लिन पाउने निर्णय गरेको छ । मन्त्रालयका प्रवक्ता गौतमका अनुसार निजी अस्पतालले पीसीअर विधिबाट कोरोना परीक्षण गर्दा सरकारले तोकेको ५५ सय रुपैयाँमा थप १० प्रतिशतसम्म सेवा शुल्क लिन पाउनेछ ।

यसरी निजीलाई अधिकार दिदाँ नागरिकमाथि लुट हुन सक्ने आशंका गरिएको छ । यसअघि निजी अस्पतालले कोरोना शंका लाग्नेवित्तिकै बिरामीको उपचार नगरेर ज्यान गुमाएका धेरै उदाहरण छन । जसले फेरि समस्या निम्त्याउन सक्ने आशंका छ ।