विविधताभित्रको एकता नै नेपाल र नेपालीको पहिचान : अध्यक्ष तिमिल्सिना

१७ साउन, काठमाडौं । राष्ट्रियसभाका अध्यक्ष गणेशप्रसाद तिमिल्सिनाले विविधताभित्रको एकता नै नेपाल र नेपालीको पहिचान तथा विशेषता भएको बताएका छन् । मुस्लिम समुदायको चाड बकर इदका अवसरमा आज एक शुभकामना सन्देश दिदै उनले बहुभाषिक, बहुसांस्कृतिक देशका रुपमा परिचित नेपालले सबै समुदाय र धर्मको सम्मानमा विश्वास राखेको बताएका हुन् ।

अध्यक्ष तिमिल्सिनाले यस चाडले नेपाली समुदायमा आपसी भ्रातृत्व, मित्रता, सामाजिक सद्भाव र एकता कायम गरी देशको समृद्धिको यात्रामा साथ पुग्ने विश्वास व्यक्त गरेका छन् । उनले यस पर्वका अवसरमा सम्पूर्ण मुस्लिम समुदायमा सुख, शान्ति, समृद्धि र सुस्वास्थ्य एवं उत्तरोउत्तर प्रगतिको शुभकामना व्यक्त गरेका छन् ।

यस्तै, राष्ट्रियसभाका उपाध्यक्ष शशीकला दाहालले पनि बकर इदका अवसरमा शुभकामना दिदै मुस्लिम समुदायमा सुख, शान्ति, समृद्धि, सुस्वास्थ्य एवं दीर्घायुको कामना गरेको छ । उनले नेपाल बहुधार्मिक, बहुसांस्कृतिक, बहुभाषिक, बहुजातीय पहिचानले समृद्ध मुलुक भएको स्मरण गरे । मुस्लिम समुदायले विशेष महत्वका साथ मनाउने यस पर्वले नेपालीका बीचमा आपसी एकता एवं सद्भाव, धार्मिक सहिष्णुता र एकअर्काप्रति सम्मानको भावना विकास गरेर लैजाने उनले विश्वास व्यक्त गरे ।