होम आइसोलेसनका संक्रमितको पुनः परीक्षण अन्योल

◊ धीरुभाइ

१८ साउन, सप्तरी । सप्तरीको विभिन्न स्थानीय तहमा होम आइसोलेसनमा बसेका संक्रमितहरुको पुनः स्वाब परीक्षण अन्योल भएको छ । राजविराज नगरसहित जिल्लामा एक दर्जन भन्दा बढी संक्रमितहरु निजी (होम) आइसोलेसनमा बसेका छन । उनीहरुमध्ये धेरै जनाको १४ दिन भन्दा बढी समय कटिसकेको छ । तर, पुनः परीक्षण नहुँदा अन्योल भएको छ ।

राजविराज नगरपालिका ६ का मृतक व्यापारीका परिवारका पाँच जनासहित अन्य होम आइसोलेसनमा बसेकाहरुको पुनःपरीक्षणको समय भइसकेको एक संक्रमितले बताए । हामीहरुको आज १५ दिन भयो, उनले भने तर फेरी स्वाब परीक्षणको लागि कहि कतैबाट सोधखोज भएको छैन । के गर्ने न गर्ने अन्योल भएको छ ।

आफुहरु संक्रमित भएका कारण बाहिर पनि निस्किन नहुने भन्दै उनले यस अवस्थामा कहाँ गएर कसरी परीक्षण गराउने समस्या भएको बताए । सो सम्बन्धमा स्वास्थ्य कार्यालय सप्तरीका निमित प्रमुख दुनियालाल यादवले आफुखुशी इच्छा अनुसार होम आइसोलेसनमा बसेको जानकारी दिदै समय पुगेपछि पुनः जाँच गराउन अस्पताल वा स्वाब संकलन केन्द्र नै आउनु पर्ने बताए ।

प्रत्येकको घर÷घरमा गएर स्वाब संकलन गर्न नसकिने उनको कथन छ । सम्पर्क गरेर कोरोना प्रयोगशालासम्म कसरी आउने जाने संक्रमित वा तिनका परिवार स्वयम् व्यवस्था मिलाउनुपर्ने उनले भने, शंकास्पद मानिसको स्वाब संकलनको लागि स्थान निर्धारण गरी सोही अनुसार जनशक्ति पचिालन गरिरहेका छौ । घर÷घरमा सेवा दिन सकिने श्रोत, साधन र जनशक्ति छैन ।

राजविराज नगरको विभिन्न वार्डका गरी १२ जना, डाक्नेश्वरी नगरपालिकामा एक, बलानबिहुल गाउँपालिकामा दुई गरी एक दर्जन भन्दा संक्रमतिहरु होम आइसोलेसनमा रहेको बताइएको छ । जिल्लाका अधिकाँश संक्रमितहरु कोभिड–१९ विशेष आइसोलेसन केन्द्रमा राखेर उपचार भइरहेको छ ।