कारोबारकाे पहिलाे दिन अजोडको शेयरमा सकारात्मक सर्किट

१८ साउन, काठमाडौं । नेपाल स्टक एक्सचेन्जमा सुचीकृत भई कारोबार खुलेको पहिलो दिनमा नै अजोड इन्स्योरेन्सको शेयरमा सकारात्मक सर्किट ब्रेक लागेको छ । ९.९७ प्रतिशतको सकारात्मक वृद्धिसहित अजोडले लगानीकर्ताको ध्यान तानेकाे छ । आज आइतबार सो कम्पनीको २९१ रुपैयाँबाट कारोबार सुरु भएको थियो । ब्रोकर नं. ५८ ले शुरुमा १० कित्ता शेयर बिक्रीका लागि हालेकामा सो शेयर ब्रोकर नं. ४७ ले खरिद गरेको थियो ।

विस्तारै कारोबार बढ्दै गयो । अजोडको शेयर बेच्ने भन्दा किन्नेको उल्लेख्य संख्या बढ्यो । त्यसपछि २९६, ३०१, ३०७, ३१३, ३१९ हुँदै ३२० मा अन्तिम कारोबार भएर आजको कारोबार रोकिएको छ । आज ४६० कित्ता शेयर १,४२,७९०/- रुपैयाँमा कारोबार भएको छ ।

अजोडले संस्थापकतर्फको ७० प्रतिशत र सर्वसाधारण तर्फको ३० प्रतिशतका दरको रू. १ अर्ब बराबरको १ करोड कित्ता शेयर सूचीकृत गराएको हो । नेप्सेले पहिलो कारोबारका लागि रू. ८७ देखि रू. २९१ सम्मको सीमा प्रदान गरेको थियो ।