मेलम्ची पहिरोमा पुरिएका ८ जनाकै शव फेला

१९ साउन, सिन्धुपाल्चोक । मेलम्ची नगरपालिका–११ मा गएराती खसेको पहिरोमा परी बेपत्ता ८ जनाकै शव भेटिएको छ । कभर्ड हल बनाउन गएका ९ मजदुर बसेको टहरा आइतबार गएराती पहिरो खस्दा पुरिएको थियो ।

पहिरोमा पुरिएका ८ जनाको शव भेटिएको हो भने एक जनाको जिवित्तै उद्धार गरिएको थियो । जिल्ला प्रहरी कार्यालय सिन्धुपाल्चोकका प्रवक्ता डीएसपी माधवप्रसाद काफ्लेका अनुसार मृत्यु हुनेमा ७ जना नेपाली र १ जना भारतीय नागरिक छन् ।

पहिरोमा पुरिएर ज्यान गुमाउनेमा वीरगञ्जका प्रदीप चौरसिया, बिक्रम थिङ, राजेश चौधरी, मानबहादुर रुम्बा, सिमन घलान, शिवबालक धामी र सोनम लामा छन । मृत्यु हुने भारतीय नागरिकमा राजेन्द्र चौरसिया छन । जिवित्तै उद्धार गरिएका अर्का भारतीय नागरिकलाई उपचारका लागि काठमाडौंको राष्ट्रिय ट्रमा सेन्टर ल्याइदैछ ।

यसअघि सिन्धुपाल्चोकको बाह्रबिसेमा पनि पहिरोले दुई जनाको मृत्यु भएको थियो भने १५ जनाभन्दा बढी बेपत्ता छन् । यस्तै मेलम्ची खानेपानी आयोजनामा समेत दुर्घटना हुँदा दुई जनाको मृत्यु भएको थियो भने दुई जना घाइते भएका थिए ।