अनशनरत ई.काे आन्दोलनप्रति ऐक्यबद्धता जनाउँदै नेपाली टोपीसहित सम्मान

१९ साउन, काठमाडौं । नेपाली कांग्रेसका युवानेता क्षितिज भण्डारीसहित सञ्चारकर्मी र सामाजिक व्यक्तित्वहरुको टोलीले बसन्तपुरमा अनशनरत ‘इनफ इज इनफ’का अभियन्तालाई नेपाली टोपी लगाएर सम्मान गरेका छन् । हरिप्रिया प्रकाश फाउन्डेसनको तर्फबाट गरिएको सम्मान र ऐक्यबद्धता कार्यक्रममा भण्डारीले १६ दिनदेखि अनशनरत ई. लगायतलाई भेटी उनले सरकार समक्ष राखेका मागहरुमा समर्थन जनाएका छन् ।

नेता भण्डारीले बिगतको लोकतान्त्रिक गणतन्त्रको यात्रामा आफ्नो अनशनको अनुभव र यसक्रममै प्रेसर, सुगर जस्ता रोगहरुको अपडाउन बारे जानकारी दिदै स्वास्थ्यमा पनि विशेष ध्यान दिन आग्रह ग्रर्दै उनको स्वास्थ्य टोलीसँग छलफल गरेका छन् ।

हरिप्रिया फाउन्डेसनको तर्फबाट वरिष्ठ सञ्चारकर्मी एवं नेपालबहसका प्रधानसम्पादक इन्द्र रिजालले १६ दिनदेखि अनशनरत ई.लाई ढाका टोपी लगाई उनको मागप्रति ऐक्यबद्धता र सम्मान प्रकट गरेका थिए । सो क्रममै सञ्चारकर्मी रिजालले कोरोना नियन्त्रणका लागि क्वारेन्टाइन व्यवस्थापन, पीसीआर परीक्षणको दायरा बढाउनुपर्ने बताउँदै अनशनमा बसेका अभियन्ताहरुलाई जनताको पक्षमा अन्ना हजारे र डा.गोबिन्द केसीले झैं अडिग नेतृत्व गरेकोमा धन्यवाद दिएका थिए ।

सोही बेला नेपाली कांग्रेसका वरिष्ठ नेता रामचन्द्र पौडेलदेखि गोरखापत्रका कार्यकारी सम्पादक शिव भट्टराई लगायत विभिन्न सामाजिक क्षेत्रमा संलग्न युवाहरुको आन्दोलनप्रति ऐक्यबद्धताका लागि समाजसेवी हरि जोशीले संयोजन गरेका थिए ।सामाजिक अभियन्ता जोशीले यो बिशुद्ध गैरराजनीतिक अनि परिवर्तनकारी सुधार योजना भएकाले सबैलाई ई को अभियानमा सामेल हुन आव्हान गरेका छन् ।

अघिल्लो अनशनमा प्रधानमन्त्री ओलीले भेटेर सरकारी पक्षबाट माग पूरा गर्ने आश्वासन दिएर स्थगित पनि ती मागहरुका बारेमा सरकारले कुनै पहलकदमी नगरेपछि पुन अनशन शुरु भएको जोशीले बताए । बसन्तपुरको अनशनमा नेपाली कांग्रेसका सभापति शेरबहादुर देउवा, वरिष्ठ नेता रामचन्द्र पौडेल, पुर्व महामन्त्री प्रकाशमान सिंह लगायत सयौं नेता तथा कार्यकर्ताले भेटेरै ऐक्यबद्धता जनाउँदै ई. को स्वास्थ्यलाभको कामना गरेकोले प्रतिपक्षी दल नै ई को समर्थनमा रहेको पुष्टि भएको युवानेता क्षितिज भण्डारीले बताए ।

पछिल्लो भेटमा वरिष्ठ नेता पौडेलले जनताका अति आवश्यक र अति साधारण मागहरु तथा युवा आवाज नसुन्नु ओली सरकारको अटेरीपन र चरम लापरबाही भएको उल्लेख गर्दै राज्यको गुण्डागर्दी, कमिशन र भ्रष्टाचार संस्कृतिलाई जरैबाट उखेल्न सबै मिलेर कडा संघर्ष गर्न सुझाव दिएको सहभागी नेबिसंघका केन्द्रीय नेता कृष्ण कुँवरले बताए ।