एउटै परिवारका १४ जना संक्रमित

१९ साउन, विराटनगर । मोरङमा एकै परिवारका १४ जनामा कोरोना संक्रमण पुष्टि भएको छ । रंगेली नगरपालिकामा सोमबार फेला परेका २२ जना संक्रमितमध्ये १४ जना एकै परिवारका हुन् ।

अरु पाँच जना विद्युत प्राधिकरण रंगेली वितरण केन्द्रका कर्मचारी र तीन जना जिल्ला अस्पताल रंगेलीका कर्मचारी पनि छन् । अस्पतालका दुई जना प्राविधिक र एक सहयोगी संक्रमित भएका हुन् ।

बुधबार कोरोनाकै कारण सोनवर्षी नगरपालिका-८ सक्टीका ४५ वर्षीय पुरुषको कोरोना संक्रमणका कारण मृत्यु भएको थियो । उनको कट्याक ट्रेसिङका क्रममा बजारका स्थानीयसहित जम्मा १५६ जनाको स्वाब संकलन गरिएको थियो ।

त्यसक्रममा २२ जनामा संक्रमण पुष्टि हुँदा १४ जना एकै घरपरिवारका परेका हुन् । एकै परिवारका १४ जनामा संक्रमण देखिएपछि मोरङमा समुदायमै कोरोना फैलिइसकेको आशंका गरिएको छ ।