प्रचण्ड–ओली सहमति प्रयास असफल !

२० साउन, काठमाडौं । बालुवाटारमा प्रधानमन्त्री तथा नेकपाका अध्यक्ष केपी शर्मा ओली र अर्का अध्यक्ष प्रचण्डबीच चार घण्टा छलफल भएको छ । नेकपाभित्रको आन्तरिक विवाद मिलाउन केन्द्रित भनिएको छलफल लगानी बोर्डको सीईओ नियुक्तीको विषयसम्म पुगेपनि टुंगोमा पुग्न असफल रह्यो ।

प्रचण्डले सरकारको निर्णयमा प्रश्न गर्दा ओलीले प्रतिवाद गर्दा सहमति हुनुको साटो सहमति प्रयास नै असफल भएको छ । छलफलमा यसअघिजस्तै गरी वरिष्ठ नेता झलनाथ खनाल र नेता सुवास नेम्वाङ पनि सहभागी थिए। तर चार नेताबीचको छलफल आज पनि टुंगोमा पुग्न सकेन । भोलि फेरि बस्ने गरी छलफल टुंगिएको नेताहरुले बताएका छन् ।

पछिल्लो छलफलमा ओलीले विवाद मिलाउन सचिवालय बैठक बस्नुपर्नेमा जोड दिएका छन् । उपाध्यक्ष बामदेव गौतमलाई आफ्नो गुटमा ल्याउन सफल भएपछि ओलीले प्रचण्डलाई सचिवालय बैठकमा जोड दिएका हुन् ।

तर प्रचण्डले भने पार्टी र सरकारका काम कारबाहीबारे जनस्तरमा प्रश्न उठेकाले स्थायी कमिटी र केन्द्रिय कमिटी बैठक बस्नुपर्ने बताउदैँ आएका छन् । प्रचण्ड लगायतका नेताहरुले प्रधानमन्त्री ओलीको राजीनामा माग गरेपछि स्थायी कमिटी बैठक स्थगित छ । त्यसयता ओलीले बैठक स्थगित गर्दै आएपनि प्रचण्डले एकपटक बैठक बोलाएर सञ्चालन गरेका थिए ।

त्यतिबेलादेखि झन उत्कर्षमा पुगेको अध्यक्षद्धयको विवाद मिल्न नसक्दा नेकपा आन्तरिक संकटबाट गुज्रदै आएको छ ।