फेरि लकडाउन गर्दा घातक हुन सक्छ : केसी

२० साउन, काठमाडौं । पूर्वमन्त्री तथा नेपाली कांग्रेसका नेता अर्जुन नरसिंह केसीले फेरि लकडाउन गर्ने सरकारको निर्णय जनताका लागि घातक हुन सक्ने बताएका छन् । मंगलबार सामाजिक सञ्जाल फेसबुकमा स्टाट्स लेख्दै केसीले सरकारले कोरोना महामारी नियन्त्रणमा ध्यान नदिई लकडाउन मात्रै गर्दा त्यो जनताका लागि घातक हुने चेतावनी दिएका हुन् ।

‘लकडाउन नै ब्रमास्त्र होइन, कडाइका साथ सुरक्षा, पीसीआर परीक्षणको व्यापकता, सीमा नियन्त्रण, क्वारेन्टाइनको वैज्ञानिक व्यवस्थापन, स्वास्थ्य संस्थाहरुको पूर्ण तयारी साथ जनसुरक्षा सरकारको प्रमुख कर्तव्य हो’ नेता केसीले भनेका छन, ‘आवश्यक व्यवस्था नगर्ने, लकडाउनको अन्य असरको सम्बोधन नगरी गरिने लकडाउन घातक हुनसक्छ ।’

प्रधानमन्त्री केपी शर्मा ओलीले मंगलबार लकडाउन गर्नेबारे विज्ञहरुसँग परामर्श गरेका थिए । काठमाडौं लगायतका मुख्य मुख्य शहरमा कोरोना फैलिएपछि सरकारले लकडाउन फेरि गर्ने विकल्पबारे परामर्श गरिरहेको छ ।