सप्तरीमा शंकास्पद तीन पुरुषको उपचारको क्रममा मृत्यु

◊ धीरुभाइ

२१ साउन, सप्तरी । कोरोनासँग मिल्दोजुल्दो लक्षण भएका तीन जना पुरुषको उपचारको क्रममा मृत्यु भएको छ । मृतकहरुमा कोरोना संक्रमणको आशंका गरेको छ । डेढ महिना अघि बैदेशिक रोजगारबाट घर आइपुगेका जिल्लाको रुपनी गाउँपालिका वार्ड नम्बर ५ गढियाका ४५ वर्षीय पुरुषमा कोरोनासँग मिल्दोजुल्दो स्वास्थ्य समस्या देखिपछि राजविराज स्थित गजेन्द्र नारायण सिंह अस्पतालमा भर्ना गरिएको थियो ।

अवस्था गम्भिर बन्दै जाँदा थप उपचारको लागि बीपी कोइराला स्वास्थ्य विज्ञान प्रतिष्ठान धरान रेफर गरिएको थियो । धरान पुगेपछि उनको मृत्यु भएको वडा अध्यक्ष जगदिश दासले बताए । उनको शव परिवारजनले घरमा ल्याएर संस्कार गर्न लाग्दा पीसीआर परीक्षणको लागि स्वाब लिन रोकेको उनले बताए ।

त्यस्तै राजविराजस्थित छिन्नमस्ता अस्पतालमा ज्वरो र श्वासप्रश्वासमा समस्या भएपछि उपचाररत डाकनेश्वरी नगरपालिका–९ का ७४ वर्षीय र राजगढ गाउँपालिकाका–७१ वर्षीय पुरुषको मृत्यु भएको छ । गत १५ गते अस्पताल भर्ना भएका दुबै जनाको गएराती मृत्यु भएको छ ।

कोरोनाको आशंका गरिएका मृतकहरुको पीसीआर परीक्षणको लागि स्वाब लिने कार्य भइरहेको स्वास्थ्य कार्यालय सप्तरीका निमित प्रमुख दुनियालाल यादवले बताए । तीनै जनाको स्वाब संकलन भएपछि मात्र संस्कार गर्न दिइने उनले भने स्वाब संकलनको लागि स्वास्थ्यकर्मी टोली पठाइसकेको छु ।