मोरङमा कोरोनाले थप दुई जनाको मृत्यु

२१ साउन, विराटनगर । कोरोना भाइरसको संक्रमणबाट मोरङमा थप दुई जनाको मृत्यु भएको छ । कोशी अस्पताल विराटनगरमा पुरुष र अस्पताल ल्याउने क्रममा बाटोमै अर्का एक जना गरी दुई जनाको कोरोनाले मृत्यु भएको हो ।

कोशी अस्पतालका मेडिकल सुपरिटेण्डेन्ट डा. चुमनलाल दासका अनुसार यसअघि मृत्यु भएका व्यक्तिमा पनि कोरोना भाइरसको संक्रमण पुष्टि भएको हो । विराटनगर महानगरपालिका– ९ का ४५ वर्षका पुरुष मंगलबार राति अस्पताल भर्ना भएका थिए । उनको बुधबार दिउँसो १ बजे मृत्यु भएको थियो ।

कलेजोको गम्भीर समस्या भएका उनी मंगलबार राति उपचारका लागि अस्पताल भर्ना भएका थिए । त्यस्तै रंगेली नगरपालिका– ८ दर्बेसाका ४५ वर्षका पुरुषको भने अस्पताल ल्याउने क्रममा बुधबार बिहान साढे १० बजे मृत्यु भएको हो ।