कांग्रेस नेता शाहीले दिए कमजोर आर्थिक अवस्थाका बिद्यार्थीलाई बर्षभरी पुग्ने शैक्षिक सामग्री

२२ साउन, कालिकोट । नेपाली कांग्रेसका युवा नेता एवं नेपाल तरुण दलका महासचिव भुपेन्द्रजंग शाहीले कालीकोटका विपन्न बिद्यार्थीलाई शैक्षिक सामग्री सहयोग गरेका छन् । नेपाली कांग्रेसबाट २०७४ सालको प्रतिनिधि सभा सदस्यका उम्मेदवारसमेत रहेका शाहीले जिल्लाको सान्नीत्रिवेणी गाँउपालिका वडा नं. २ सेरिज्यूलाका गोरख तिरुवालाई शैक्षिक सामग्री सहयोग गरेका हुन् ।

सान्नीत्रिवेणी गाँउपालिका वडा नं. २ स्थित शंकर मावि सेरीज्यूलामा कक्षा १० मा अध्ययनरत बिद्यार्थी तिरुवालाई बर्षभरी पुग्ने गरी कापी कलमसहित आर्थिक सहयोग गरिएको हो । योगा तथा जेम्नेष्टिक खेलाडी समेत रहेका तिरुवालाई पढाईमा निरन्तरता दिनका लागि आफुले व्यक्तिगत रुपमा सहयोग गरेको युवानेता शाहीले बताए । उनले भने, ‘आर्थिक अवस्था निकै कमजोर परिवारका गोरख बहुप्रतिभाशाली बिद्यार्थी रहेछन् । मैले उनको प्रतिभालाई निखार्दै पढाईलाई निरन्तरता दिनका लागि सहयोग गरेको हुँ ।’ उनले गाँउमा लुकेर रहेका प्रतिभावान बिद्यार्थीहरुलाई थप प्रेणा र उर्जा प्रदान गर्न सबैले सक्दो सहयोग गर्नुपर्ने बताए ।

नेता शाहीले आफुले दुई दुई पटक कालिकोटबाट संसदीय निर्वाचनमा पराजय भोगेपनि आफु सधैं कालीकोटबासीको दुख र पीडामा साथ दिदै आएको र भोलिका दिनमा पनि निरन्तर सहयोग दिने बताए । विगतदेखि नै राजनीति र सामाजिक सेवामा सक्रिय नेता शाहीले राजनीति भनेकै सामाजिक सेवा भएकाले त्यसप्रति सधैं लागिरहने बताए ।

कांग्रेस नेता शाहीद्धारा सहयोग गरिएका शैक्षिक सामग्रीहरु बुझ्दै गोरख तिरुवाले भने, ‘मलाई नियमित बिद्यालय जान शैक्षिक सामग्रीको अभावको समस्याले बारम्बार पीडा दिएको थियो । खाली झोला महिनौं बिद्यालय गएको छु । घरमा भन्दा मैले सहजै शैक्षिक सामग्रीको लागि आवश्यक रकम पाउदिन थिए । कसैको भारी बोकेर मैले आफ्नो खर्च व्यवस्थापन गर्नु पथ्र्यो । तर कांग्रेसका नेता भुपेन्द्रजंग शाहीले आफुलाई बर्षभरी पुग्ने शैक्षिक सामग्री सहयोग गर्नुभयो । उहाँलाई धन्यवाद दिन्छु । मैले अब एसईईसम्म ढुक्कसँग बिद्यालय जाने भँए ।’

उनले आफुसँग भएको योगा सम्बन्धि ज्ञान र अन्य जेम्नेष्टिक, दौड जस्ता प्रतिभाले भविश्यमा योगा प्रशिक्षक वा चलचित्र क्षेत्रमा लाग्ने इच्छा रहेको बताए । शैक्षिक सामग्री सहयोग कार्यक्रममा नेपाली कांग्रेस कालिकोटका सहसचिव तथा प्रदेश सभापति दमनबहादुर शाही, नेबिसंघका कार्यवाहक अध्यक्ष जगत बिष्ट, कांग्रेस नेता बिस्नराज संज्याल, सन्तोष मल्ल लगायतको सहभागिता रहेको थियो ।