कोरोनाले ५ जनाको मृत्यु, मृत्तकको संख्या ७३ पुग्यो

२३ साउन, काठमाडौं । कोरोना भाइरसको संक्रमणबाट नेपालमा शुक्रबार ५ जनाको मृत्यु भएको छ । ललितपुरको पाटन अस्पतालमा दुई, धरानको वीपी कोइराला स्वास्थ्य विज्ञान प्रतिष्ठानमा एक, विराटनगरको कोशी अस्पतालमा एक र वीरगञ्जको गण्डक अस्थायी कोरोना अस्पतालमा एक जना गरी पाँच जनाको मृत्यु भएको हो ।

यससँगै नेपालमा कोरोनाबाट मृत्यु हुनेको संख्या ७३ पुगेको छ । पाटन अस्पतालमा सर्लाहीका ४५ वर्षीय पुरुष र रुपन्देही सुनौलीकी ४१ वर्षीया महिलाको मृत्यु भएको हो । सर्लाहीका पुरुषलाई कुकुरले टोकेर अस्पताल भर्ना भएका थिए । यस्तै रुपन्देहीकी महिलाको पाठेघर क्यान्सको समस्या थियो । दुवैमा संक्रमण देखिएको थियो । कोरोनाकै कारण उनीहरुको शुक्रबार बिहान ज्यान गएको हो ।

यस्तै सिराहाको गोलबजार नगरपालिका–१२ का २१ वर्षीय युवकको धरानस्थित बीपी कोइराला स्वास्थ्य विज्ञान प्रतिष्ठानमा मृत्यु भएको छ । मिर्गौला रोगी उनी डायलासिस सेवा लिन धरान पुगेका बेला संक्रमणमा परेका थिए । उपचारकै क्रममा उनको मृत्यु भयो ।

यस्तै कोशी अस्पतालको आइसोलेसन कक्षमा उपचाररत विराटनगर महानगरपालिका– ९ का ५८ वर्षका पुरुषको पनि मृत्यु भएको छ । मृत्यु भएपछि कोरोना परीक्षण गर्दा उनमा कोरोना पुष्टि भएको हो ।

वीरगञ्जको नारायणी अस्थायी कोभिड विशेष अस्पतालमा शुक्रबार वृद्धको पनि ज्यान गएको छ । वीरगञ्ज–३ छपकैयाका ६५ वर्षका वृद्धको मृत्युपछि गरिएको परीक्षणमा कोरोना पुष्टि भएको थियो ।

नेपालमा एकैदिन कोरोनाले ५ जनाको ज्यान गएको यो दोस्रो पटक हो । यसअघि मंगलबार एकैदिन ५ जनाको मृत्यु भएको थियो । कोरोना संक्रमणबाट मृत्यु हुनेको संख्या बढेपछि सरकारले देशभर जोर विजोर प्रणाली लागु गरेको छ ।

संक्रमणको अवस्था थप भयावह हुन थालेपछि काठमाडौ उपत्यकामा आइतबारदेखि सटडाउन लागु गरिएको छ । अहिलेसम्म २१ हजार बढीमा कोरोना संक्रमण पुष्टि हुँदा १५ हजार उपचारपछि घर फर्किएका छन् । तर अहिलेसम्म ७३ जनाले भने कोरोनाकै कारण ज्यान गुमाएका छन् ।